மழலைச் சொல்

பாலைவனத்துல நான்

2008-10-25T04:08:00.001-07:00

இண்டக்கி இரவு நா கனவு கண்டேன். அந்தக் கனவு ரொம்ப ரொம்ப கூடாத கனவு. அந்தக் கனவு எதப் பத்தின்னா, ஒரு எலும்புக்கூடு என்னைத் துரத்துது. அது ஒரு பாலைவனம். பின்னாடியே ஓடி வருது. நா வந்து ரொம்ப வேகமா ஓடுறேன். ஒரு பிரமிடுக்குள்ள ஓடுறேன். நா இன்னும் வேகமா ஓடுறதுக்கு மூணு குட்டிக்கரணம் போட்டேன். ஓ நோ! நா மறிபட்டுட்டேன். அதுக்கப்புறம், நா வந்து பவர் ரேஞ்சரோட லீடரா உருமாறிட்டேன். அதுக்கப்புறம், நா வந்து எலும்புக் கூட்டைப் பாத்தேன். அதுக்கப்புறம்...அதுக்குப் புக்குமணியில ஒரு குத்து விட்டேன். இப்ப அந்த எலும்புக் கூட்டுக்கு லீடர் யாரு? நாந்தான். அதுக்கப்புறம், நா வந்து ஒரு குட்டிக் கரணம் போட்டு அந்த எலும்புக் கூட்டை தூத்துமணியில ஒரு உதை விட்டேன். தி எண்ட்.

டைடானிக் கதையின் நீதி

2008-08-23T02:33:00.000-07:00

ராத்திரி தூங்கப் போகும்போது நா அப்பாவுக்கு ஒரு கதை சொன்னேன். அது டைடானிக் கதை. ஒரு கப்பல் செஞ்சாங்க. அதுக்கு 11 மாடி இருந்துச்சு. உள்ளே விளையாட்டு எல்லாம் இருந்துச்சு. இது மாதிரி கப்பலை யாரும் பாத்ததே இல்லன்னு சொன்னாங்க. ஒரு மிதக்குற நகரம்னு அந்தக் கப்பலைச் சொன்னாங்க. அது இங்கிலாந்துல இருந்து அமெரிக்காவுக்கு வந்துச்சு. அதுல நிறைய ஆக்கள் ஏறினாங்க. கப்பல் போகும்போது அதொட கேப்டன் ஒரு பெரிய பனிப்பாறையைப் பாத்தார். அப்போ அந்தக் கப்பலைத் திருப்பப் பாத்தார் ஆனா, திருப்ப முடியலை. கப்பல் அதுல போயி உரசிடிச்சு. கப்பல்ல இப்படி (கைகளைக் கோர்த்து வளைத்துக் காட்டி) ஒரு ஓட்டை வந்திடிச்சு. அதுக்குள்ள தண்ணி வந்திடிச்சு. கப்பல் இப்படி ஆடுது. இப்படி ஆடுது. அப்பறம் இப்படி இப்படி முழுகுது. அப்ப நிறைய ஆக்கள் கடலுக்குள்ள குதிச்சிட்டாங்க. லைப் போட்ல கொஞ்சம் பேரு ஏறிட்டாங்க. அடுத்த நாள் காலையில வரைக்கும் காப்பாத்த யாரும் வரலை. அப்புறமா ஒரு கப்பல் வந்திச்சு. அதுக்கு எல்லாரும் தீக்குச்சியைக் கொழுத்தி, பேப்பரை எரிச்சுக் காட்டுறாங்க. அந்தக் கப்பல் வந்து எல்லாரையும் காப்பாத்திடிச்சு.

கதை முடிஞ்சதும் அப்பா சொன்னாங்க, "ச்ச, ரொம்ப வருத்தமா இருக்கு, இல்ல?" நா சொன்னேன், "கொஞ்சம் வருத்தம், கொஞ்சம் மகிழ்ச்சி." அப்பா கேட்டாங்க, "ஏன் மகிழ்ச்சி?" அதுக்கு நா சொன்னேன், "வருத்தம் ஏன்னா அந்தக் கப்பல் மூழ்கிடிச்சு. மகிழ்ச்சி ஏன்னா காலையில இன்னொரு கப்பல் வந்து நிறைய ஆக்களைக் காப்பாத்திடுச்சில்ல, அதுக்கு."

இன்னக்கி எனக்கு நல்ல கனவா வரும்னு சொல்லிட்டுத் தூங்கப் போயிட்டேன்.

இன்பம் துன்பம் எல்லாம் நம்ம பார்க்கிற விதத்திலதான் இருக்குன்னு அப்பாவுக்கு விளங்கியிருக்கும்!

அதோ அந்தப் பறவை போல!

2008-08-10T12:15:00.000-07:00

நானும் அப்பாவும் எங்களோட ரகசிய இடத்துக்குப் போனோம். அங்க சைக்கிள்லதான் போகணும். அங்க நிறைய மரங்கள், ஒரு ஏரி எல்லாம் இருக்கும். வெயில் அடிச்சிச்சா, அதனால நாங்க ஒரு மரத்துக்குக் கீழ நின்னோம். அப்ப நாங்க பேசிக்கிட்டோம்:

நா: இந்த ஏரியில குளிக்க முடிஞ்சா நல்லா இருக்கும்.
அப்பா: இங்க நீங்க ஆத்துல, ஏரியில குளிக்க முடியாது. ஏன்னா சில நேரம் முதலைகள் இருக்கும். ஆனா இந்தியாவுல, ஈழத்துல நீங்க குளிக்கலாம்.
நா: ஆனா ஈழத்துக்கு நம்ம போக முடியாதே.
அப்பா: ஆமா இப்ப சண்டை நடக்குது. அங்க கூடாத ஆமி நிக்கிது. குண்டெல்லாம் போடுவாங்க. அதனால போமுடியாது.
நா: சண்டை எப்ப முடியும்?
அப்பா: தெரியாது குஞ்சு. புலிகள் எல்லாம் அந்த கூடாத ராணுவத்தை விரட்டின பிறகுதான் அங்க இருக்கவங்க எல்லாம் நிம்மதியா இருக்கலாம். குளத்தில போயி குளிக்கலாம்.
நா: எனக்கு அந்த கூடாத ஆமி மேல விருப்பம் இல்ல. குண்டு போடுறது விருப்பம் இல்ல.
அப்பா: எல்லாருக்கும் அதுதான் குஞ்சு வேணும். உலகத்துல சண்டை இல்லாம, வெடி குண்டு இல்லாம, எல்லாரும் அன்பா இருக்கணும்.
நா: நா பெரிய பிள்ளையா வந்த பிறகு ஒரு recycle ஆளா மாறி, எல்லா fighter jets, வெடிகுண்டு எல்லாத்தையும் உருக்கிடுவேன்.
அப்பா: குஞ்சு, அதுக்கு நீங்க recycle ஆளா வரக்கூடாது. ஒரு பெரிய political scientist அல்லது
நா: ஒரு கவர்னர் அப்படி.
அப்பா: ஆமா, ஒரு பெரிய அதிகாரம் இருக்கணும் அப்பதான் 'நமக்கு இந்த துப்பாக்கி, குண்டு எல்லாம் வேண்டாம், அமைதியா இருப்போம்னு சொல்லி எல்லாத்தையும் தூக்கிப் போடலாம்.
நா: ஆமா, ஆமா. நா சொல்லுவேன், we do not want fighter jets, we dont want bombers, no more guns, thank you.
அப்பா: நல்லது குஞ்சு. அதுக்குத்தான் நான் சொல்லுவேன் நீங்க துப்பாக்கி விளையாட்டு விளையாடக் கூடாதுன்னு.
நா: சரி அப்பா, நா இப்ப மூணு வார்த்தை சொல்றேன், I Dont Like Guns. Actually அப்பா, அது நாலு வார்த்தை.

அப்புறமா நாங்க வீட்டுக்கு வந்துட்டோம். வீட்டுல விளாடும்போது நா "ஒரே வானிலே, ஒரே வானிலே" அப்படின்னு பாடினேன். எங்க கேட்டிங்க இந்தப் பாட்டைன்னு எல்லாம் கேட்டாங்க. நா ஒரு பஸ்சில் அந்தப் பாட்டைக் கேட்டேன். நீங்களும் கேளுங்க!

நம்பளோட பள்ளிக்கூடம்

2007-12-16T16:15:00.000-08:00

இதான் நம்பளோட பள்ளிக்கூடம். எனக்கு அங்க இருக்கது விருப்பம். நம்பளோட 24 பிள்ளைங்கள் இருக்காங்க நம்மளோட வகுப்புல. 899 பிள்ளைங்க நம்பளோட பள்ளிக்கூடத்துல இருக்காங்க. நம்மளுக்கு கிண்டர்கார்டன் இருக்கு, அப்புறம் நடுநிலைப்பள்ளி இருக்கு. அதுக்கப்புறம் நிறைய பிள்ளைங்க இருக்காங்க. நோவா, கேலப், எல்லாப் பிள்ளைங்களும் என்னோட நண்பர்கள். ஆனா ஈதன் மட்டும் இல்ல. ஏன்னா ஈதன் ர்ர்ர்ர்ர்ர்ர்ர்ர்ர்ர!!!!!!!!!!!!!!!!!!!!!!!! அப்படின்னு செய்வாங்க. அதுக்குத்தான் அவங்க எனக்கு விருப்பம் இல்ல. முதல்நாள் பள்ளிக்கூடத்துக்கு வர்றது எனக்கு ஆச்சரியமா இருந்துச்சு. முதல் நாள் அம்மா அப்பா வந்தாங்க என்னை விடுறதுக்கு. எனக்கு நிறைய பென்னி (penny) கிடைக்கும். நா பள்ளிக்கூடத்துல நல்ல பையனா இருக்கேன்!! அதுக்குத்தான் பென்னி கிடைக்கும். நா ரொம்ப தெம்பு. நா வந்து விளாடுவேன். நா வந்து சாக்கர் விளாடுவேன்! நோவா, நா, டிலன், லியம் நிறைய பேர் விளாடுவோம்!& ஷார்க் அட்டாக் (சுறா தாக்கு) விளாடுவோம். நான், லூயிஸ், ஜேக்கப் எல்லாரும் தண்ணிக்குள்ள இருப்போம். நம்ம சுறாவா மாறுவோம். நம்ம லூயிஸைத் தாக்க வருவோம். அவர்தான் ஆள். நம்ம வந்து பைரட்ஸ் விளாடுவோம். அது ரொம்ப விருப்பம் இல்லை xxxx @@ அது எனக்கு விருப்பமேஏஏஏஏஏஏஏ இல்ல. பள்ளிக்கூடத்துல சாப்பாடு நல்லாருக்கும். ஆனா சிலது கொழுப்பு. அதை மட்டும் சாப்பிட்டுறாதீங்க!

இஞ்சி ரொட்டி வீடு

2007-12-15T09:26:00.000-08:00

ஒரு நாள் ஒரு இஞ்சி ரொட்டி வீட்டை (ginger bread house) நம்மளோட பள்ளிக்கூடத்துல செஞ்சோம். சந்தோஷமா இருந்துச்சு. சில அம்மாக்கள் வந்தாங்க, உதவி செய்றதுக்கு. நம்மளோட ஆசிரியரும் அங்க இருந்தாங்க. ரெண்டு ஆசிரியர்கள் இருந்தாங்க.
ஒரு தட்டை எடுத்தோம். அது பனி மாதிரி வெள்ளையா இருந்துச்சு.
ஒரு பால் பெட்டிய எடுத்தோம். சூடான பசையால தட்டோட சேத்து ஒட்டுனோம். அந்த ஐசிங் எனக்குக் கையில பிடிச்சிருச்சு.

ஆஆஆஆஆஆஆஆஆஆஆஆஆஆஆன்னு கையை உதறினேன். "ஓஓஓஓஓஓஓஓஓஓஓஓஓஓஓஓஓ காம் டவுன் தம்பி" அப்படின்னு ஆசிரியர் சொன்னாங்க. ரொட்டியோட ஒட்டினேன். ஆனா அதை ஆசிரியர்தான் செஞ்சாங்க. நோ ஃபேர்!!!!!! (No fair!). ஆனா நம்ம செஞ்சா சுட்டுரும். அதனாலதான் ஆசிரியர் செஞ்சாங்க. அப்புறம் முட்டாய் எல்லாம் நாங்க வச்சோம். அதை சாப்பிடலை. ஏன்னா அதுல ஔ.....பசை இருக்கு. அது சாப்பிடக் கூடாத பசை. அப்புறம் அதை வீட்டுக்குக் கொண்டு வந்துட்டேன். நா பள்ளிப் பேருந்துல வந்தேன். யாரோ என்னோட வீட்டைப் பாத்து "வாவ், நீங்க செஞ்சீங்களா?"ன்னு கேட்டாங்க. நா "ஆமா, நன்றி"ன்னு சொன்னேன்.

செல்கள்

2007-11-12T17:55:00.000-08:00

என்னோட அப்பா புடிக்கும். என்னோட அப்பா எனக்கு ரொம்ப புடிக்கும். என்னோட அப்பா நல்லா சாக்கர் விளாடுவாங்க. அவங்க சாக்கர்ல வந்து ரொம்ப நல்லா இருக்காங்க. என்னோட அப்பா, நல்லா போவாங்க. அப்பா வந்து, நிறைய நுண்ணோக்கில கண்டுபிடிப்பாங்க. ஒரு நுண்ணோக்கி ரொம்ப ரொம்ப ரொம்ப ரொம்ப கண்ணுக்குத் தெரியாத செல்ஸ்ஐ வந்து பாக்க வைக்கும். சில செல்ஸ் நல்லது. வெள்ளை செல்கள் நல்லது. சிவப்பு செல்கள் நல்லது. சில சிவப்பு செல்கள் காதுக்குள்ள இருக்கும். அது ரொம்ப கூடாதது. அது வலிக்கும். எனக்கு ஒன்னு இருந்துச்சு. நா வந்து, பள்ளிக்கூடத்துல இருக்க டாக்டர் ஆபிசுக்குப் போனேன். ஊசியெல்லாம் போடலை. லை லை லை லை. நல்லா இருந்தாங்க அந்த நர்ஸ். எனக்கு விருப்பம் அந்த நர்ஸ். அந்த நர்ஸ் எனக்கிட்ட நல்லா பார்த்தாங்க, காதுக்குள்ள. கொஞ்சம் இளஞ்சிவப்பு இருந்துச்சு. என்னோட சிவப்பு செல் கீழ கீழ கீழ கீழ வக்கிது. அது ரொம்ப வலியா இருந்துச்சுன்னா செல் வந்து ரொம்ப சிவப்பா இருக்கும். அந்த சிவப்பு செல் கூடாதது. சில சிவப்பு செல் நல்லது. வெள்ளை செல் கூடாத பச்சை பாக்டீரியா எல்லாம் வந்து எடுத்துரும்.

எனக்கு அழுகை வருது

2007-11-11T18:21:00.000-08:00

நான் அழுகிறென். அம்மாவுக்கும் அப்பாவுக்கும் விளங்கலெ. ஏன் அழுகிறேனெண்டு என்னால சொல்ல முடியாது. முதுகில கடிக்கிறது (அரிக்கிறது), பலூன் உடையுறது, இருட்டு எல்லாத்தையும் பார்த்து அழுகிறென். இந்த ஊரு நண்பர்களும், பள்ளிக்கூடத்துப் பிள்ளைகளும்தான் கத்துக் கொடுத்தாங்க, தங்கச்சி அழுகிறப்ப அம்மாவும் அப்பாவும் தூக்குறாங்க, அதனாலதான் நான் அழுது அவங்கட கவனத்தை வேண்டுறேன் எண்டு அம்மாவும், அப்பாவும் பேசிக் கொள்கிறாங்க. சில நேரம் விளையாட்டுக் காட்டுறாங்க. சில நேரம் பேசிப் பேசிச் சொல்லுறாங்க. சில நேரம் கண்டிப்பா சொல்லுறாங்க. நானும் சில நேரம் கேப்பென், சில நேரம் கேட்க மாட்டென். அழுகிறது எனக்குப் பிடிக்கலைதான். ஆனாலும் சில நேரம் நான் அழுகிறென். படத்தில அழுகிறது நான் இல்ல!

பெரிய பிள்ளையா வரணும்

2007-07-28T04:32:00.000-07:00

நா பெரிய பிள்ளையா வந்திட்டன். ஆமா, எனக்கு இப்ப அஞ்சு வயசு. எனக்குப் பெரிய பிள்ளையா, அப்பா அளவுக்கு வரணும் எண்டு ஆசையா கிடக்கு. அண்டக்கி நானே என்னோட படுக்கையில படுத்துக் கொண்டென். எனக்குப் பொறுப்பு வரணும் எண்டு அம்மாவும் அப்பாவும் சொல்லுறாங்க. சரி எண்டு சொல்லிப்போட்டு எண்ட குழப்படியை ஆரம்பிக்கிறென்.

எனக்குத் தங்கச்சி விருப்பம். ஆனா அவங்களை நா அப்பைக்கு அப்ப, வம்பு இழுத்துக்கொண்டு இருப்பென். கூடாது எண்டு தெரியும் ஆனாலும் எண்ட குறும்பு அப்படி ஆக்கிரும். ஏன் இப்படி செய்யிறீங்க எண்டு அம்மா அப்பா கேட்டா, நா அப்படித்தான் இருக்கென் எண்டு சொல்லுவென்.

இண்டக்கி என்னொட நண்பர்கள் எல்லாம் எங்க வீட்டுக்கு வருவாங்க. எனக்கு நண்பர்கள் எண்டா நல்ல விருப்பம். வெயிலில ஓடுவென், சைக்கிள் ஓட்டுவென், பந்து அடிப்பென். அப்புறம் கொஞ்சம் பாடமும் படிப்பென். என்ன தம்பி பள்ளிக்கூடம் போறிங்களா எண்டு எல்லாரும் கேக்கிறாங்க. ஆனா நா இன்னம் போகலை. இனிமேலதான் போவென்.

நா நிறைய படம் எடுப்பென். அழகா இருக்கே எண்டு எல்லாம் சொல்லுவாங்க. இப்ப கெமராவில பேட்டரி தீந்து போயிடுச்சி. இது நா ஒரு கண்ணாடிக் குவளைக்கு உள்ள வச்சி எடுத்த படம்.

ஒயினால் கீறிய படம்

2007-06-27T21:25:00.000-07:00

நா தண்ணியைக் குளிர்சாதனப் பெட்டிக்குள்ள வைப்பேன். அது உறைஞ்சு பனிக்கட்டியாப் போயிடும். அது crystal, படிகம். ஒரு நாள் அப்பா ஒயின் குடிச்சாங்க. எனக்கு ஒயின் படிகம் எப்படி இருக்கும்னு பாக்க ஆசை வந்திச்சு. அப்பாட்ட ஒயின் கேட்டேன். குளிர்சாதனப் பெட்டில வச்சா ஒயின் படிகம் வராது, ஆனா ஒரு கிண்ணத்தில ஊத்தி ரொம்பநாள் வச்சா வந்தாலும் வரும்னு அப்பா சொன்னாங்க. சரியெண்டு, ஒரு கிண்ணத்த எடுத்து அதில கொஞ்சம் ஒயினை ஊத்தி ஒரு ஓரமா வச்சிட்டோம். ஒரு இருவது நாளு கழிச்சு, எடுத்துப் பாத்தோமா, ஒரு படிகமும் இல்ல. ஆனா ஒயின்ல இருந்த தண்ணியெல்லாம் வத்திப் போயி, கொஞ்சம் கொளகொளன்னு இருந்திச்சு. இதுல இனி படிகம் வராதுன்னு நெனக்கிறேன்னு அப்பா சொல்லிட்டாங்க. அப்புறமா, ம்...இது நல்ல நிறமா இருக்கு, இதால படம் கீறுறீங்களான்னு அப்பா கேட்டாங்க. நானும் சரின்னு சொல்லிட்டு கீறினேன். அதான் இது.

ஒயின் கொஞ்சந்தான இருந்திச்சு. அதோட கொஞ்சம் பிரஷ்ல ஒட்டி, பிசுபிசுவெண்டு போச்சா. உடனே அதில என்ன ஊத்தலாம்னு யோசிச்சோம். குளிர்சாதனப் பெட்டியத் திறந்து ஆராய்ஞ்சோமா, இதை ஊத்துவமான்னு கேட்டேன். அப்பாவும் அது சரியான யோசனைனு சொல்லிட்டாங்க. அது vanilla extract. அதுல கொஞ்சம் ஊத்தினவுடனெ, பிசுபிசுன்னு பிரஷ்ல இருந்த ஒயினெல்லாம் கரைஞ்சு நல்லா வந்திடுச்சு. அப்புறமா கீறினது இது. ஒரு பறவை.

அம்மா சொன்னாங்க, இது ரெண்டு பக்கமும் பறக்கிற மாதிரி இருக்குன்னு. அப்புறம் இன்னும் கொஞ்சம் vanilla extract ஊத்தி கீறினது இது. ஒரு எரிமலை, பாத்தீங்களா கல்லு எல்லாம் பறந்து வந்து விழுகுது!

வீட்டுக்குள்ள வானவில் வந்திச்சு

2007-04-29T14:53:00.000-07:00

காலையில நானும் அப்பாவும் படிச்சுக் கொண்டு இருந்தமா. அப்ப அம்மா எங்களைக் கூப்பிட்டு அங்கெ பாருங்க வானவில் எண்டு காட்டினாங்க. அது சுவத்தில இருந்திச்சு. அப்பா அதைப் படம் எடுத்தாங்க.
இங்கெருந்துதா வருது எண்டு ஒரு குறுந்தகட்டைக் காட்டினாங்க. சூரிய ஒளி அதில பட்டு ஏழு நிறங்களா மாறிடுச்சுன்னு சொன்னாங்க. அப்ப நா குறுந்தகட்டைத் திருப்பினேனா, உடனே இப்படி இப்படி எல்லாம் வித விதமா வானவில் வந்திச்சு. நா திருப்பத் திருப்ப அப்பா படம் எடுத்தாங்க.

பாத்தீங்களா, எங்கட வீட்டுக்குள்ள வானவில் வந்ததை?!

பாட்டியின் கைவண்ணம்

2007-03-16T01:56:00.000-07:00

நானும், பாட்டியும் ஒரு நாள் படம் கீறினொம். இது பாட்டி கீறின படம்.

இது பாட்டி அட்டையைக் கொண்டு பின்னியது. அதுக்கு நா நிறம் தீட்டினென்.
நா கீறின படங்களை நாளக்கிப் போடுறென் சரியா?!

பறவையை அணில் விரட்டுது

2007-03-15T01:09:00.000-07:00

எங்க வீட்டுக்கு முன்னாடி ஒரு மரம் இருக்கு. அதில ஒரு தானியக்கூடு வச்சிருக்கம். அதுக்கு நிறைய பறவைகள் வரும். இப்ப வசந்த காலம்தானே. புதுசு புதுசா சில பறவைகளும் வருது. சில அணில்களும் வரும். இந்த அணில்கள் வந்தா பறவைகளையெல்லாம் விரட்டி விரட்டி விட்டுடுவாங்க. கீழ கொட்டுறதை வந்து பறவைகள் சாப்பிட்டா, அணில் கீழ இறங்கி வந்து பறவையை விரட்டும். அந்த அணில் எப்படித் தாவித் தொத்தி சாப்பிடுது எண்டு பாருங்க. அணில் சில நேரம் தலைகீழா தொங்கிக்கிட்டே சாப்பிடும். நம்ம அப்படித் தலைகீழாத் தொங்கிக்கிட்டே சாப்பிட முடியுமான்னு அப்பா கேட்டாங்க. முடியாதுன்னு சொன்னென். ஆனா நா தலைகீழா நிப்பேன்னு சோபாவில ஏறி நின்னு காட்டினேன். அணிலுக்கு ஏன் தொங்க முடியுதுன்னா அவங்களுக்கு மரத்தை நல்லாப் பிடிச்சுக்கொள்ற மாதிரி நகங்கள் இருக்கு. அதான்.

பறவைக் கூடு

2007-02-27T02:31:00.000-08:00

அப்பா வேலையில இருந்து வரும்போது நா வெளியில விளாடிக்கொண்டு இருந்தேன். அப்பாவொட கார் தெரிஞ்சதும், ஓடிப் போயி ஏறிக் கொண்டேன். நானும் அப்பாவுந்தான் காரைக் கொண்டு வந்து நிறுத்துவோம். கியரை D க்கு நகர்த்தினா கார் ஓடும். நிறுத்திட்டு P யில போடணும். அதையெல்லாம் நாந்தான் நகர்த்துவேன்.
காருக்குள்ள அப்பா கேட்டாங்க,
"என்ன விளாடுறீங்க, குட்டி?"
நா சொன்னேன், "ஒரு பறவைக் கூடு கட்டுறேன்."
"பறவைக் கூடா?"
"ஆமா! இந்தக் குச்சியை எல்லாம் எடுத்து இப்பிடி இப்பிடி வச்சு. அதோ இருக்கு!"
"ஓ!"
"கீழ கிடக்கிற குச்சியையெல்லாம் பொறுக்கி இந்தக் கொட்டு வண்டியில வச்சுக் கொண்டு வந்து கட்டுறேன்."
அப்புறம் கிட்ட போயி பாத்தோம்.
"இதுக்குள்ளதான் வந்து முட்டையெல்லாம் இடும்,"னு சொல்லிட்டு கூட்டுக்குள்ள கையை விட்டுக் காமிச்சேன்.

என் கேள்விக்கு என்ன பதில்?-3

2007-02-20T02:43:00.000-08:00

நானும் அப்பாவும் காரில போய்க்கொண்டிருந்தொம். அப்ப ஒரு ஹெலிகாப்டர் மேல போச்சுது. நா அப்பாட்ட கேட்டென்,
"அப்பா இந்த ஹெலிகாப்டர் என்ன வேகத்தில போகுது?"
அப்பா சொன்னாங்க, "ஒரு 100 மைல் வேகம் இருக்கும் குட்டி."
கொஞ்சம் நேரம் கழிச்சுக் கேட்டென்,
"அப்பா விமானத்தோட வேகத்தை எப்படிப் பாக்குறாங்க?"
"என்ன குட்டி?"
"கார்ல எல்லாம் தெரியிதுல்ல, 40 அப்படின்னு அதுமாதிரி விமானம் போறப்ப அதோட வேகம் எப்படித் தெரியும்?"
"அதாவது விமானத்தோட வேகத்தை எப்படி அளக்குறாங்கன்னு கேக்கறீங்களா?"
"ஆமா"
"ம்...நல்ல கேள்வி குட்டி. நா என்ன நெனக்கிறென்னா, விமானம் இப்ப இங்க இருக்குன்னு வச்சுக்குவொம், இன்னும் ஒரு நிமிஷத்துல இன்னொரு இடத்தில இருக்கும். அப்ப ரெண்டுக்கும் நடுவுல இருக்க தூரத்தைக் கணக்குப் போட்டுப் பாத்தா விமானத்தொட வேகம் தெரியும். அது விமானிக்குப் பக்கத்தில இருக்க திரையில தெரியும்."

(அப்பா சொன்னது எனக்குப் புரிஞ்சிச்சா, புரியலையா எண்டது வேறெ. நீங்க சொல்லுங்க விமானத்தொட வேகத்தை எப்பிடி தெரிஞ்சுக்கிறது?:))

என் கேள்விக்கு என்ன பதில்?-1
என் கேள்விக்கு என்ன பதில்?-2

முயலும் ஆமையும்

2007-02-06T04:34:00.000-08:00

அப்பா எனக்கு ஒரு கதை சொன்னாங்க. அது 'முயலும் ஆமையும்' கதை. அப்பா சின்னப் பிள்ளையில கேட்ட கதையாம். அதான், முயல்கூட நித்திரை கொண்டுரும், ஆமை வெல்லுமே அந்தக் கதை. சொல்லி முடிச்சுட்டு அப்பா கேட்டாங்க, "இதிலெருந்து உங்களுக்கு என்ன தெரியுது?"
நா சொன்னென், " ஆமைதான் வேகமா ஓடும்!"

கனவு வரணும்

2007-02-04T04:58:00.000-08:00

தூங்கும்போது எனக்குக் கனவு வரும். நேத்து அப்பாகிட்ட சொன்னென், "அப்பா, எனக்குக் கனவெல்லாம் திரும்பத் திரும்ப வரணும்," எண்டு.
"ஏன் குட்டி?"
"அப்பதா நல்லா சிரிப்பாருக்கும். தினம் கனவு வரணும்."
நா தூங்கும்போது சில நேரம் சிரிப்பென்னு அம்மாவும் அப்பாவும் சொல்லுவாங்க. ஆனா monster (பூதம்), சிலந்தி எல்லாம் வந்தா அழுவென். கனவில சிரிச்சா எந்திரிக்க மாட்டென், ஆனா அழுதா எந்திரிச்சிடுவென். தூங்குறதுக்கு முன்னாடி புத்தகம் படிச்சா நல்ல கனவா வரும்னு அம்மா சொன்னாங்க. அம்மா எனக்குப் புத்தகம் படிப்பாங்க.

ஒளி விளையாட்டு

2007-02-01T03:51:00.000-08:00

நானும் அப்பாவும் ராவையில ஒளி விளையாட்டு விளாடுவோம். ஒளி விளையாட்டு எப்படி விளாடுறதுன்னா, ஒரு இருட்டறைக்குள்ள போவொம். ஃப்ளாஷ் லைட்டை (torch light) எடுத்து பை, பலூன், பிளாஸ்டிக் விளையாட்டு சாமான்கள், பந்துகள், வண்ணக் காகிதங்கள் எல்லாத்துக்கு உள்ளயும் அடிப்போம். அப்ப அழகான வண்ண வெளிச்சமெல்லாம் தெரியும். அப்பாவும் நானும் கதை, பாட்டு, வசனம், வாயாலே எதாச்சும் இசை எல்லாம் சொல்லிக்கிட்டே லைட் அடிச்சு விளாடுவோம். அருண் மாமா எனக்கு ஒரு சின்ன ஃப்ளாஷ் லைட் தந்தாங்க. அதுக்குள்ள ஒன்பது பல்பு இருக்கு. டார்ச் லைட்டை அடுத்தாக்களோட கண்ணில, முகத்தில அடிக்கக் கூடாது. ஏன்னா கண்ணு கெட்டுப் போய்டும். நா தினமும் ஒளி விளாட்டுக்கு அப்பாவக் கூப்பிடுவென். ஆனா அப்பா சில நேரம் வருவாங்க, சில நேரம் நாளக்கி விளாடலாம்னு சொல்லுவாங்க.

அக்கினிக் குஞ்சொன்று கண்டேன்!

2007-01-30T00:22:00.000-08:00

எங்க ஊரில பொங்கல் விழா நடந்திச்சு. அப்ப அதில பாட்டுப் பாட வேண்டி அம்மா, அப்பா, பாட்டி எல்லாரும் எனக்குப் பாடச் சொல்லித் தந்தாங்க. நாங்க பொங்கல் கொண்டாட்டத்துக்குப் போனம். அங்கெ நிறைய ஆக்கள் இருந்தாங்க.

என்னயக் கூப்பிட்டுப் பாடச் சொன்னாங்க. அப்பாவும் என்னொட மேடைக்கி வந்தாங்க. வந்து மைக்கைப் பிடிச்சுக் கொண்டாங்க. நா வந்து அகர முதல, குழல் இனிது யாழ் இனிது திருக்குறள் ரெண்டும் சொல்லிப்போட்டு, ரெண்டு பாட்டுப் பாடினென். அதான் துடுப்பிடு துடுப்பிடு பிறகு மின்னி மின்னி விண்மீனே. அது ரெண்டையும் English அப்புறம் தமிழ்ல பாடினேன்.

பாடினத்துக்குப் பிறகு அப்பா இன்னொரு பாட்டு பாடச் சொல்லி மைக்கை நீட்டினாங்க. நா சொன்னேன், "எனக்கு ஒன்னுக்கு வருது", எண்டு. எல்லாரும் சிரிச்சாங்க. அப்பாவும் சிரிச்சுப்போட்டு, இதப் பாடி முடிச்ச பிறகு போலாமெண்டு சொன்னாங்க. சரியெண்டு நா அக்கினிக் குஞ்சொன்று கண்டேன் பாட்டப் பாடினென். இங்கெ போயி அதை நீங்களும் கேட்கிறிங்களா?

எல்லாப் பாட்டும் பாடி முடிச்ச பிறகு எனக்கு ஒரு பரிசு குடுத்தாங்க. அது ஒரு கார் புத்தகம்!

நா ஒரு பெரியண்ணா!

2007-01-28T08:59:00.000-08:00

அம்மாவொட முட்டிக்குள்ள இருந்த பாப்பா வெளியால வந்திட்டாங்க. இப்ப நா பெரியண்ணா ஆயிட்டேன். எனக்கு ஒரு ஸ்டிக்கர் குடுத்தாங்க, அதை சட்டையில ஒட்டிக்கொண்டேன். தங்கச்சிப் பாப்பாவைத் தூக்கி மடியில கொடுத்தாங்க. வச்சுக்கொண்டு பெரிய ஆக்கள் மாதிரி நானும் பாப்பாவை ஆட்டிப் பாத்தேன். ஆட்டினா பாப்பாவுக்கு வலிக்குமெண்டு சொல்லிட்டாங்க. பாப்பா தூங்கிக் கொண்டே இருக்காங்க. சில நேரம் நா வீட்டுக்குள்ள சத்தம் போடுறென். அப்பதான் பாப்பா முழிப்பாங்க. முழிச்சா நா கிட்டப் போயி கையைப் பிடிச்சுக் கூப்பிடுவேன். ஏனெண்டா பாப்பா என்னோட விளாடணும். அதுக்கு பாப்பா இன்னும் கொஞ்சம் பெரிசா வரணுமெண்டு சொல்லிட்டாங்க. ஒரு நாள் பாப்பாவுக்குச் சோச்சி குடுக்கலாமா எண்டு கேட்டேன். கூடாதுன்னு அம்மா சொன்னாங்க. அவங்க பால் மட்டுந்தான், அதுவும் ப்ரிட்ஜில இருக்கது இல்ல, அம்மாட்ட இருந்து மட்டுந்தான் குடிக்கணும் எண்டு சொல்லிட்டாங்க. ஒரு நாள் ஒரு கத்தரிக்கோல் மேசை மேல இருந்திச்சா, அப்பாவக் கூப்பிட்டு, அப்பா, இந்தக் கத்தரிக்கோலை சின்னப் பிள்ளைங்களுக்கு எட்டாத இடத்தில வச்சிருங்க எண்டு சொன்னேன். அப்பாவும் சரி எண்டு சொல்லி வச்சிட்டாங்க. நா பொறுப்பான பெரியண்ணாவா வந்திட்டேன் எண்டு சொன்னாங்க.

நா ஏன் கத்துறேன் தெரியுமா?

2007-01-17T03:26:00.000-08:00

சில நேரம் நா வெளியில போயி ஊஊஊ... எண்டும், ஆஆஆ... எண்டும் பலமாக் கத்துவேன். அம்மாவுக்கும், அப்பாவுக்கும் நா ஏன் அப்படிக் கத்துறேன் எண்டே புரியலை. அப்பா சொன்னாங்களாம், "அவருக்குள்ள இருக்க எதையோ வெளியில விடுறார், விடட்டும்," எண்டு. அம்மா சொன்னாங்களாம், "அப்படிக் கத்துறது, தம்பி பாதுகாப்பா விளையாடுறார் எண்டு சொல்லுற மாதிரி இருக்கு," எண்டு.

நேத்து ராச்சாப்பாட்டுக்குப் பிறகு நானும் அப்பாவும் வெளியில போயி குப்பையைப் போட்டிட்டு, கொஞ்ச நேரம் நடந்தோம். அப்ப நா மறுபடியும் ஊஊஊ... எண்டு கத்தினென். கத்திட்டு, "பாத்தீங்களா, எக்கோ (echo) வருது!" எண்டு சொன்னென். "ஓ! இதுக்குத்தான் இப்படிக் கத்துறீங்களா?" எண்டு அப்பா கேட்டாங்க. "ஆமா." எண்டு சொன்னென். "யாரு குட்டி இப்படிக் கத்துவா?" எண்டு அப்பா கேட்டாங்க. "யாரும் இல்ல, அந்த ச்சூ ச்சூ கதையில வருமே ஒரு ரயில் அதுதான் அப்படிக் கத்தினே போவும்," எண்டு சொன்னென்.

அப்புறமா எக்கோவுக்குத் தமிழ்ல எதிரொலியெண்டு சொன்னாங்க. பந்தை சுவத்தில அடிச்சா திரும்பி வருற மாதிரிதான் சத்தமும் திரும்பி வருமாம், அதான் எதிரொலி எண்டு சொன்னாங்க.

கொண்டாட்டத்துக்குப் போனோம்

2007-01-16T03:45:00.000-08:00

அண்டக்கி ஒரு நாள் நா, அம்மா, அப்பா, பாட்டி, சித்தியாக்கள் எல்லாரும் ஒரு கொண்டாட்டத்துக்குப் போனொம். அது Happy New Year. அங்க நிறைய லைட் எல்லாம் போட்டிருந்திச்சு. நா அங்க ஓடி ஓடி விளாண்டேன். குட்டிக் கரணம் போட்டேன். ஒரு இடத்தில பாட்டுக் கச்சேரி நடந்திச்சா. போயிப் பாத்தோம். மேடைக்கி முன்னுக்குச் சில பிள்ளைகள் ஆடிக்கொண்டிருந்தாங்க. நானும்போனேன். கொஞ்ச நேரம் நின்னு பாத்தேன். அப்புறம் நிறைய போட்டோ எடுத்தேன். நிண்டு கொண்டே காலைக் கொஞ்சம் ஆட்டி ஆட்டி டான்ஸ் ஆடினேன். அப்புறமா வீட்டுக்கு வந்தோம்.

தானியக் கூடு

2007-01-15T16:38:00.000-08:00

எங்க வீட்டுக்கு முன்னாடி ஒரு மரம் இருக்கு. ஒரு நாள் நாங்க கடைக்குப் போயி ஒரு தானியக்கூடும் ஒரு பை நிறைய தானியங்களும் வாங்கிட்டு வந்தோம். தானியக் கூட்டுக்குள்ள நாந்தான் தானியத்தைக் கொட்ட உதவி செஞ்சேன். அப்புறமா அதை மரத்தில தொங்க விட்டோம். முதல்ல பறவைகள்லாம் வந்து சாப்பிடவே இல்ல. அப்புறமா, நிறைய பறவைகள் வந்திச்சு. புறா, கருங்குருவி, blue jays, robin (சிவப்புக் குருவி), சின்னோண்டு குருவி அது பேரு அடைக்கலங்குருவின்னு அம்மா சொன்னாங்க, எல்லாம் காலையில வந்து கீச் மூச்சுன்னு கத்தும். எல்லாப் பறவைகளும் தானியக்கூட்டுல இருந்து கொத்திச் சாப்பிடும். ஆனா புறா மட்டும் கீழ சிந்துகிற தானியத்தைத்தான் கொத்திச் சாப்பிடும். ஆனா ஒரு புறா தானியக் கூட்டில இருந்தும் சாப்பிடும். சில வேளைகளில அணிலும் கீழே வந்து கொறிச்சு கொறிச்சு சாப்பிடும். தானியம் தீர்ந்து போனா மறுபடியும் கொட்டி வைப்போம். இப்பவெல்லாம் தினமும் நிறைய பறவைகள் வரும். மழை பெஞ்சாலும் வரும். வெயில் அடிச்சாலும் வரும். எனக்குப் பறவைகளைப் பார்க்கிறது விருப்பம்.

பஞ்சுச் செடி

2006-11-22T18:53:00.000-08:00

நா நெறைய வெளியிலயே விளாடுவேன். என்னோட கொட்டு வண்டிய எடுத்துக்கிட்டு முழங்கால் வரைக்கும் ஒரு பூட்ஸ் போட்டுக்கொண்டு போவேன். இங்க தினம் வெயில் அடிக்கும். ஆனா அண்டைக்கிக் கொஞ்சம் பனியும் பெஞ்சுது. பக்கத்து வீட்டில எபி எண்டு ஒரு நாய் இருக்கு. அவங்க வீட்டில ஒரு பூனையும் இருக்கு. அவங்க வீட்டு சன்னல்கிட்ட போய் நின்னு பூனையைப் பாப்பேன். இன்னொரு வீட்டில சிக்கா எண்டு ஒரு நாய் இருக்கு. சிக்காவோட அம்மா எங்கிட்ட பேசிக்கொண்டே இருப்பாங்க. சில நேரம் என்னோட சைக்கிளை ஓட்டுவேன். வீட்டுக்குப் பக்கத்தில ஒரு நீச்சல் குளம், டென்னிஸ் விளாடுற இடம் எல்லாம் இருக்கு. அப்புறம் கடற்கரையும் இருக்கு. எனக்கு நிறைய நண்பர்கள் எல்லாம் இருக்காங்க. நாங்க வேற ஊருக்கு வந்திட்டோம். இங்க வரும்போது பருத்திச் செடியப் பாத்தேன். அப்பதான் செடியில பஞ்சு இருக்கதே பாத்தேன். நா ஒரு பஞ்சைப் பறிச்சிட்டேன். அப்பா அதைக் கொஞ்சம் முறுக்கினாங்க. நீளமா நூல் வந்திச்சு. வீட்டுக்கிட்ட ஒரு வாய்க்கா இருக்கா, அதில குஞ்சு மீனெல்லாம் இருக்கு. அதால போனா எங்க நூல் நிலையம் வரும். அங்க போயி நிறைய புத்தகம் எல்லாம் எடுத்திட்டு வருவேன்.

எனக்குப் பிடிச்ச நிறங்கள்

2006-10-23T11:12:00.000-07:00

காகிதத்துல நா ஒரு சித்திரம் கீறத் தொடங்கினேன். கொஞ்சம் வண்ணத்தைப் பூசிட்டு அப்படியே மேசை மேலயே விட்டுட்டேன். அப்புறம் அடுத்த நாள் கொஞ்சம் பூசினேன். அதற்கடுத்த நாளும் கொஞ்சம். இப்படி மூண்டு நாள் அந்தச் சித்திரத்தைக் கீறினேன். கீறி முடிச்சுட்டு அந்தக் காகிதத்தை எடுத்து அதில் என் வண்ணப் பெட்டியை வைத்துச் சுற்றினேன். அப்பா அதற்குள் ஓடி வந்து அந்தக் காகிதத்தைக் கசக்க வேண்டாமெண்டு சொல்லிட்டு,
"ஆமா இதுல என்ன கீறினீங்க?"ன்னு கேட்டாங்க.
"அதா, அது ஒன்னும் இல்ல, அதெல்லாம் எனக்குப் பிடிச்ச நிறங்கள்" அப்படின்னு சொன்னேன்.
அப்புறம் நீளமா இருந்தவொரு கோட்டைக் காட்டி, "இது என்ன?"ன்னு கேட்டாங்க, நா சொன்னேன், "அது சிவப்பு." அதைக் கேட்டுட்டு அம்மா, அப்பா, பெரியம்மா, பெரியப்பா எல்லாம் சிரிச்சாங்க.

ஒரு பெரிய பையனின் படுக்கை

2006-10-18T11:13:00.000-07:00

என்னைச் சின்னப் பிள்ளைன்னு சொன்னா எனக்குப் பிடிக்காது. ஏன்னா நா பெரிய பையனா வந்திட்டேன். சின்னப் பிள்ளைங்களோட பொம்மையெல்லாம் பாத்தா "இதெல்லாம் சின்னப் பிள்ளைங்க விளாடுறது"ன்னு சொல்லுவேன். நா ஒரு நாள் பாட்டியோட இருந்து American Funny Videos பாத்தேன். அப்புறம் ராவில தூங்கப் போறப்ப அம்மா கேட்டாங்க, "குஞ்சு நீங்கதான் பெரிய பிள்ளையா வந்துட்டீங்க, பெரிய ஆக்களோட டி.வி ப்ரோக்ராம் எல்லாம் பாக்குறீங்க, அப்புறம் ஏன் நீங்க பெரிய பிள்ளைங்க மாதிரியே உங்களோட கட்டில்ல தனியாப் படுக்கக் கூடாது?" இது எனக்குக் கொஞ்சம் கஷ்டமான வேலை. அது என்னை மாதிரியே வளருற படுக்கைதான். நா சின்னப் பிள்ளையா இருந்தப்ப சின்னதா இருந்திச்சு, பெரிய பையனா வந்தப்புறம் பெரிசாயிடுச்சு. ஆனாலும் எனக்கு அப்பாம்மாவோட சேர்ந்து தூங்கத்தான் விருப்பம். தூங்கினப்புறம் தனியே தூக்கிப் போட்டாலும் நடுவில முழிச்சு ஓடி வந்துடுவேன். அப்ப நா சொன்னேன் "அம்மா, நா அதைப் (வீடியோவை) பாக்கணும்னு பாக்கலை, சும்மாதான் பாத்தேன்". அப்புறம் சொன்னேன் "அம்மா, நீங்களும் அப்பாவும்தான் உலகத்திலயே நல்ல அம்மா அப்பா." என்ன சொன்னா என் வேலை நடக்கும்னு எனக்குத் தெரியும்!

Tele எண்டா தொலை

2006-09-05T04:24:00.000-07:00

படுக்கையில அப்பாவோட கிடந்து புரண்டு கொண்டிருந்தேன். அப்பா தன்னோட விரல்களைச் சுருட்டி, குழாய் மாதிரி செஞ்சு அது வழியா என்னைப் பாத்தாங்க. நானும் அப்படிச் செஞ்சேன். "இப்படி நாம தொலைநோக்கியால பாத்தா நச்சத்திரம், அம்புலி எல்லாம் பக்கத்துல தெரியும்"னு சொன்னாங்க.
அப்போ நா கேட்டேன் "நச்சத்திரம், அம்புலி எல்லாத்தையும் தொலைநோக்கி புடிச்சு கிட்ட இழுத்துக்கிட்டு வருமா?"
"இல்ல குட்டி, தொலைநோக்கியில இருக்க கண்ணாடியெல்லாம் சேந்து நமக்கு அப்படி கிட்டக்க தெரியும்."
"Telescopeன்னா தொலைநோக்கி
Telephoneன்னா தொலை பேசி
Televisionன்னா தொலைக் காட்சி
அப்போ Teleன்னா என்னா?"ன்னு அப்பா கேட்டாங்க.
நா சொன்னேன் "தொலை!"
அப்புறம் நா யோசிச்சுட்டு சொன்னேன், "Teletubbies!"
அப்பா சிரிச்சுட்டு கேட்டாங்க, "அப்படின்னா என்ன குஞ்சு?"
"அது தெரியும், ஆனா எங்கயும், தூஊஊஊரத்திலயும் இருக்காது,"ன்னு சொன்னேன்.
"ஓ டெலிடபிஸ் நிஜமா இருக்காதா?"ன்னு அப்பா கேட்டாங்க.
"இல்லை. அது ஒரு friendly monster. தொலைக்காட்சியில தெரியும். ஆனா நிஜமா அப்படி யாரும் இருக்க மாட்டாங்க,"ன்னு நா சொன்னேன்.

அப்படித்தான் சொல்லுவாங்க

2006-09-01T08:17:00.000-07:00

வேற வேற ஆக்களா மாறி விளாடுறது எனக்கு விருப்பம். சில நேரம் நா அப்பாவா மாறிடுவேன். அப்பா குஞ்சா மாறிடுவாங்க. இல்லாட்டி நா Fred. அப்பாதான் Bill. Fred, Bill எல்லாம் அப்பாவோட வேலை செய்றாங்க. சில நேரம் நாந்தான் சின்ன தீயணைப்பு வீரர், அம்மாதான் பெரிய தீயணைப்பு வீரர். ஊய்ய்ய்ங் ஊய்ய்ய்ய்ங் அப்படீன்னு கத்திக்கிட்டே ஓடுவோம்.

ஒரு நாள் நா அப்பாவா இருந்தேன். அப்பா குஞ்சா இருந்தாங்க. அப்போ நா விறுவிறு எண்டு கிளம்பிக்கொண்டே "குஞ்சு நா சீக்கிரம் வேலைக்கிப்போணும், இன்னக்கி ஒரு மீட்டிங் இருக்கு" அப்படின்னு சொன்னேன். உடனே அப்பா எனக்குக் குறுக்கெ கையை நீட்டிக்கொண்டு "இல்லை அப்பா நீங்க இப்ப போக்கூடாது"ன்னு சொன்னாங்க. அதுக்கு நா சொன்னேன் "இல்ல குஞ்சு அங்க Bill எல்லாரும் காத்திருப்பாங்க, நா போகணும், சாயங்காலம் வந்து விளாடுறேன், சரியா?" அப்படின்னு சொன்னேன். அப்பாக்கள் எல்லாம் அப்படித்தான் சொல்லுவாங்க.இதான் நா கீறுன அப்பாவோட பஸ். நீலமா இருக்கது வானம்.

பொறந்த நாளக்கி

2006-08-28T03:47:00.000-07:00

நாங்க கடைக்குப் போனோம். அம்மாவும் அப்பாவும் சாமான்கள் வாங்கிட்டு இருக்கும்போது நா பொம்மைகள் பக்கம் இருந்த பெரிய கொட்டு வண்டி, மோட்டார் சைக்கிள் எல்லாத்தையும் பாத்துக்கொண்டு இருந்தேன். எனக்கு வண்டி வாகன பொம்மைகள் ரொம்ப ரொம்ப ரொம்ம்ம்ம்ம்ம்ப விருப்பம். சில வண்டிகள்ல சுவிட்ச்சைப் போட்டா ட்ர்ர் ட்ர்ர்ருன்னு கத்தும், லைட் அடிக்கும். சில பொம்மைகள் பாடும். பேசும். இன்னும் நிறைய பொம்மைகளை ஒவ்வொன்னா பாத்துக்கொண்டு இருந்தேன். கொஞ்ச நேரத்தால அம்மாவும் அப்பாவும் போலாமான்னு கேட்டாங்க. "எனக்கு இது இது இது இது எல்லாத்தையும் பொறந்த நாளக்கி வாங்கித் தாங்க" ன்னு சொல்லிட்டு எல்லா பொம்மைகளையும் வச்சுட்டு கிளம்பிட்டேன். வரும்போது "I had fun" அப்படின்னு சொல்லிக்கிட்டு வந்தேன்.

காந்தம்

2006-08-27T15:16:00.000-07:00

என்னோட தாமஸ் ச்சூச்சூ ரயில்ல காந்தம் இருக்கு. அது பெட்டியை எல்லாம் வரிசை வரிசையா ஒட்டும். அண்டைக்கு பெரியப்பாவும் பெரியம்மாவும் எனக்கு ஒரு சாமான் அனுப்பினாங்க. அது ரெண்டு சுருக்குப்பை நிறைய காந்தம். அது எல்லாம் பள பளன்னு சின்னக் கல்லு மாதிரி இருக்கும். அந்தக் காந்தக் கட்டியை எல்லாம் சேத்தா கார், கப்பல், ரயில், வாத்து எல்லாம் செய்யலாம். சோஃபா இடுக்குல ஒரு காந்தம் விழுந்திட்டா எல்லா காந்தங்களையும் சங்கிலி மாதிரி செஞ்சு அதைத் தூக்கலாம். ஒரு நாள் அந்தக் காந்தத்தை தொலைக்காட்சிப் பெட்டி மேல வச்சேன். திடீர்னு திரை ஊதா (நாவல்) மாதிரி மாறிடுச்சு. அப்புறம் தொலைக்காட்சிப் பெட்டியை நிறுத்திட்டு மறுபடியும் போட்டப்புறம் தான் சரியா வந்துச்சு. காந்தத்தை கணினிகிட்டயும் வைக்கக் கூடாதுன்னு சொன்னாங்க.

என்னோட நல்ல நண்பர்

2006-08-25T10:53:00.000-07:00

எனக்கு ஒரு நல்ல நண்பர் இருக்கார். அவர் பேரு ல்யூல். அவர் எத்தியோப்பியா நாட்டுக்காரர். அவர் வீடு எனக்குப் பக்கத்து வீடு. முந்தி எல்லாம் விளாட மாட்டோம். இப்ப நானும் ல்யூலும் அடிக்கடி விளாடுறோம். சில நேரம் விக்டரும் வருவார். விக்டர் இந்தியாக்காரர். காலையில எழும்பொதே "என்னோட நல்ல நண்பரோட இண்டக்கி விளாடுவேன்" னு சொல்லிக்கிட்டேதான் எழுவேன்.

அவர் சாய்ங்காலம் பள்ளிக்கூடத்திலேருந்து வந்ததும் எனக்கு போன் செய்வார். நாங்கள் போய் விளாடுவோம். கொட்டு வண்டி, பந்து, ஓடிப்புடிச்சு அதான் விளாடுவோம். இருட்டு வந்துடும். அப்புறம் அம்மா அப்பா கூட்டிட்டுப் போவாங்க. எனக்குக் கஷ்டமா இருக்கும். ஆனா இம்புட்டு நேரம் விளாண்டதுக்காக சந்தோஷப்படனும், நாளக்கி மறுபடியும் விளாடலாம்னு சொல்லுவாங்க. சரின்னு கேட்டுக்குவென். சில நேரம் மத்தியானத்தில "அம்மா, இதான் நாளைக்கா?"ன்னு கேப்பேன். அம்மா ஆமெண்டு சொன்னா, "இண்டக்கி என்னோட நல்ல நண்பரோட விளாடுவேன்"னு சொல்லுவேன். ஏன்னா எனக்கு விளாடுறது விருப்பம். என்னோட நல்ல நண்பரோட விளாடுறது விருப்பம். ஆனா அந்தப் படத்தில இருக்கது நாங்க இல்ல.

ஒட்டகச்சிவிங்கியின் கழுத்து

2006-08-24T06:49:00.000-07:00

இன்னைக்கு நிலா வெளிச்சக் கதைநேரத்துக்கு நானும் அம்மாவும் போனோம். எப்பவும் போல இண்டைக்கும் Steve தான் கதை சொன்னாங்க. என்ன கதை தெரியுமா? எப்படி ஒட்டகச்சிவிங்கிக்கு நீளமான கழுத்து வந்துச்சு அப்புறம் எப்படி chip munksக்கு எல்லாம் முதுகில மூணு கோடு வந்துச்சுது எண்டு. கதை சொல்லி முடிஞ்சோடன, ஒட்டகச்சிவிங்கி செய்ய ஒரு தண்ணி குடிக்கிற குவளையும் ஒரு குச்சியும் ஒரு வாலும் ஒரு ஒட்டகச்சிவிங்கியோட படமும் எல்லாருக்கும் குடுத்தாங்க. அம்மாவும் நானும் ஒரு ஒட்டகச்சிவிங்கி செய்தோம்.

முதல்ல படத்துக்கு வண்ணம் பூசிட்டு, குச்சியில ஒட்டினோம்.அப்புறம் குவளையில ஒரு ஓட்டை போட்டு, வண்ணம் பூசி, வாலை அதில சொருகி வச்சோம்.
ஒட்டகச்சிவிங்கியை அந்த ஓட்டைக்குள்ள போட்டோம். இப்ப கழுத்து சின்னதாத்தானே இருக்கு?

இப்ப குவளைக்குள்ள கை விட்டு குச்சியத் தூக்கினா ஒட்டகச்சிவிங்கிக்குக் கழுத்து நீளமா வந்துடும்!

அப்பாவின் சமையல்

2006-08-23T20:04:00.000-07:00

சனிக்கிழமை அப்பாதான் வீட்டில சமையற்காரர். சமைச்சாங்க சமைச்சாங்க ரொம்ப நேரமா சமைச்சுக்கொண்டே இருந்தாங்க. அம்மாவும் நானும் படங்களுக்கெல்லாம் நிறம் தீட்டிக்கொண்டிருந்தோம். அப்போ அப்பா என்னைக் கூப்பிட்டாங்க. என்கிட்ட ஒரு கிண்ணத்துல அவங்க சமைச்ச கறியைக் குடுத்து சுவைச்சுப் பாக்கச் சொன்னாங்க. அப்போ அம்மாவுக்கு எதுக்கோ கோவம் வந்திருச்சு. நா அம்மாகிட்ட கறியை நீட்டிக்கொண்டே சொன்னென், "அம்மா, இத மணந்து பாருங்க கோவமெல்லாம் போயிரும்." எல்லாரும் சிரிச்சாங்க.

நீங்க எதிர்பார்க்கிற பதில்

2006-08-21T03:55:00.000-07:00

பாத்ரூமில நானும் அப்பாவும் நுரையைப் பத்திப் பேசிக்கொண்டிருந்தோம். நுரைக்குள்ள காத்து இருக்கும்னு அப்பா சொல்லிட்டு,
"குட்டி, வடிவம் இல்லாதது எது தெரியுமா?"ன்னு கேட்டாங்க.
வடிவம்னாலே வட்டம், சதுரம், முக்கோணம் இப்படித்தானெ புத்தகத்தில போட்டிருக்கும்? வடிவம் இல்லாததுன்னா? யோசிச்சுட்டு சொன்னேன்,
"மனுஷங்க".
அப்பா சிரிச்சாங்க. எப்படியாச்சும் காத்துங்கிற பதிலுக்கு ஒரு கேள்வியைக் கேட்டுப்பிடனும்னு நெனச்சாங்களோ என்னவோ, அப்பா அடுத்து கேட்டாங்க,
"சரி, பார்க்க முடியாதது எது?" (எதை?)
நா சொன்னேன்,
"இருட்டு."
"சரியான விடைதான்"னுஅப்பா சிரிச்சிட்டு நுரைக்குள்ள காத்து இருக்கும்னு மறுபடியும் கதை சொல்ல ஆரம்பிச்சிட்டாங்க.

தண்ணி விளாட்டு

2006-08-20T05:27:00.000-07:00

அப்பாவும் நானும் ஒரு விளாட்டு விளாடுவோம். அது பேரு தண்ணி விளாட்டு. அது எப்படின்னா, அப்பா சொல்லுற எல்லா வார்த்தைகளையும் நா திரும்பவும் சொல்லனும். ஆனா அப்பா 'தண்ணி' அப்படின்னு சொன்னா மட்டும் சொல்லிறக் கூடாது. சொல்லிட்டேன்னா அப்பா 'தம்பி நல்லா மாட்டிக்கொண்டார்'ன்னு சொல்லிக்கிட்டே என்னைக் கிச்சு கிச்சு பண்ணிடுவாங்க. நா கவனமா இருந்து 'தண்ணி'ன்னு சொல்லிடாம 'No'ன்னு சொல்லிட்டேன்னா 'தப்பிச்சாருய்யா'ன்னு சொல்லுவாங்க. எனக்குத் தப்பிக்கிறது விருப்பம். அப்புறம் மறுபடியும் அப்பா நிறைய வேற வேற வார்த்தையெல்லாம் சொல்லுவாங்க. நா திருப்பிச் சொல்லுவென், ஆனா கவனமா 'தண்ணி'யே சொல்லாம தப்பிச்சுருவென்.

துடுப்பிடு துடுப்பிடு

2006-08-19T13:48:00.000-07:00

ஏரிக்குப் போன அன்றைக்கு நாங்க எல்லாரும் துடுப்புப் படகில போனோம். அப்பொ ஒரு பாட்டுப் பாடினொம். அதான் துடுப்பிடு பாட்டு. அதைக் கேட்க இங்கெ அழுத்துங்க. அதோட ஆங்கில ஒலியைக் கேட்க இங்கெ அழுத்துங்க.

(இந்த வார நட்சத்திரமாக மழலையைத் தேர்ந்தெடுத்த தமிழ்மண நிர்வாகிகளுக்கும், மறுமொழிகளில் ஊக்குவித்த நண்பர்களுக்கும் நன்றி!)

கடற்கரைக்குப் போனோம்

2006-08-19T03:38:00.000-07:00

நாங்க கடற்கரைக்குப் போனோம். நா எப்போதும் என்னோட கொட்டுவண்டியைக் கொண்டு போவென். போயி அதில மண்ணை அள்ளி அள்ளி ஓட்டிக்கொண்டுபோய் கொட்டுவேன். ஏன்னா கட்டுமான வேலைக்கெல்லாம் மண்ணு வேணுந்தான? எங்கெ கட்டுமான வேலை நடக்குது எண்டு அப்பா கேட்டாங்க. பெங்களூரில எண்டு சொன்னென்.

ஒரு லாடநண்டு (horse-shoe crab) பாத்தென். அது செத்துப் போனது. கடிக்காது. தொட்டுப் பாத்தென். சில நேரம் அசையாம தரையில மல்லாந்து கிடக்கும். எடுத்து தண்ணியில போட்டா ஓடிப் போயிடும். அப்பா திருப்பிப் போட்டாங்க. அது நகரவே இல்ல.

நா மணல்ல கோடு போட்டென். அப்பா 'அ' போட்டாங்க. என்னிட்ட 'ம' எழுதுறீங்களா எண்டு கேட்டாங்க. எழுதினென்.

ஆனா அப்புறம் சொன்னதையெல்லாம் எழுதாம ஓடிப் போயிட்டென். நா என்னோட கொட்டு வண்டியோட விளையாண்டென். அப்புறமா அம்மாவுக்கு ஒரு ஆச்சரியம் கொண்டு வந்தேன். அது ஒரு நண்டுக்கால்.

டெய்சிக்குப் புத்தகம் விருப்பம்

2006-08-18T03:09:00.000-07:00

அம்மா என்னை நூல் நிலையத்துக்கு கூட்டின்னுப் போனாங்க. அண்டைக்குத்தான் கோடைகால நிகழ்ச்சிகளின் கடைசி நாள். கோடைகாலத்தில நானும் அம்மாவும் சேர்ந்து 56 புத்தகங்கள் வாசித்தோம். எனக்கு ஒரு சான்றிதழும் கொடுத்தாங்க. அன்றைக்கு நூல் நிலையத்துக்கு டெய்சியும் வந்தாங்க. டெய்சி ஒரு பன்றி. அதுக்கு 12 வயசாம். கறுப்பா இருந்துச்சி. சின்ன பாப்பாக்களையெல்லாம் வச்சிருப்பாங்களே தள்ளு வண்டி, அதுல படுத்து தூங்கிட்டே இருந்திச்சி. அந்த பன்றிக்குட்டியேட அப்பா பேரு திரு மைனர் (படத்தில இருக்காங்களே அவங்கதான்). அம்மா பேரு திருமதி மைனர். ராத்திரியில அதோட அம்மா அப்பாவோடத்தான் தூங்குமாம். அதுக்கு புத்தகங்கள் வாசிக்க விருப்பமாம். அதோட அப்பா தினமும் நிறைய புத்தகங்கள் படிச்சுக் காட்டுவாங்களாம். டெய்சிக்கு விருப்பமான புத்தகங்களையும் கொண்டு வந்து வச்சிருந்தாங்க. டெய்சி மாதிரியே நாங்களும் படிக்கணுமாம். நா போறப்ப அது எந்த வித்தையும் காட்டல, எதுவும் பேசல. சும்மா தூங்கிட்டே இருந்திச்சு. என்னை மாதிரி நிறைய சின்ன பிளைங்கள் எல்லாம் வந்திருந்தாங்க. அதுக்கு நா முத்தம் கொடுத்தேன், கட்டியும் புடிச்சேன்.

பாட்டு சிடி

2006-08-17T06:31:00.000-07:00

வீட்டில இருக்க சிடி எல்லாத்தையும் எடுத்துக் கீழே போடுவென். எடுத்து வச்சிடுங்கன்னு சொன்னா எனக்கு முடியாது. அப்புறம் யாராச்சும் உதவி செஞ்சாத்தான் எடுத்து அடுக்கி வைப்பென். சிடி எண்டா குறுந்தகடு. Bryan Adams, Jewel, Carpentersன்னு மூனு சிடிக்கள் இருக்கு. அதை ஓயாம கேப்பென். அந்த சிடி அட்டையில இருக்க படங்களைப் பாத்துக்கொண்டே இருப்பென். அம்மாவும் அப்பாவும் எனக்கு நிறைய பாட்டுக்கள் பாடுவாங்க. தூங்கும்போது எல்லாரும் பாடுவோம். இப்ப ஒரு பாட்டு பாடப்போறென். பாட்டைக் கேட்க இங்க அழுத்துங்க.

என் கேள்விக்கு என்ன பதில்? -2

2006-08-16T03:26:00.000-07:00

நா நிறைய கேள்வி கேப்பெந்தான. அண்டக்கிக் கேட்ட கேள்வியெல்லாம் ஒண்டாவது பாகத்தில இருக்கு. இதெல்லாம் ரெண்டாவது பாகம். இன்னம் நிறைய பாகங்கள் வரும். நல்லா பதில் சொல்லுற ஆக்களுக்கு எண்ட சொக்காவில (chocolate) கொஞ்சம் தருவென். பதில் சொல்லலையெண்டாலும் பிரச்சனை இல்ல :))

1. பழம் சாப்பிடும்போது ஏ விதையச் சாப்பிடக்கூடாது?
2. கத்தியால வெட்டும்போது ஏ வெட்டுப்படுது?
3. சாப்பிடும்போது எப்பிடி நசியிது?
4. ஏன் அம்மாக்கள்லம் லிப்ஸ்டிக் போடுறாங்க?
5. விதை எப்படி மரமா வளருது?
6. காட்டுல மரம் விழுந்தா ஏ இன்னொரு மரமும் விழுகுது?
7. இலங்கையில ஏ பிரச்சனை நடக்குது?

இண்டக்கிப் படம் போடுற நாள்

2006-08-15T08:19:00.000-07:00

இது நா நேத்து வெட்டி ஒட்டினது. சும்மா. என்னவெண்டு தெரியாது.
இதா நா விரலால கீறின வானவில்

இது அப்பா வேலைக்கிப் போற மெப் (map)

மின்னி மின்னி விண்மீனே

2006-08-14T12:13:00.000-07:00

அப்பா: குட்டி, நட்சத்திரம்னா என்ன?
நா: ஸ்டார்
அப்பா: நட்சத்திரம் என்ன செய்யும்?
நா: மின்னும்.
அப்பா: உங்களுக்கு நட்சத்திரமா இருக்கது விருப்பமா?
நா:இல்ல.
அப்பா: ஏன் குட்டி?
நா: ஏன்னா எனக்கு (நா) மின்னுறது விருப்பம் இல்ல.

அம்மா, "ஒரு நட்சத்திரப் படம் கீறுறீங்களா?" எண்டு கேட்டாங்க. நா கீறுனென். "இது finger painting அம்மா" எண்டு சொல்லிட்டு விரலால பெயிண்டை எடுத்துப் பூசினென்.
அப்பா: சரி மேல இருக்கது நட்சத்திரம், கீழ இருக்கது என்ன குட்டி?
நா: கோடு

மின்னி மின்னி எண்டு ஒரு பாட்டை அப்பா சொல்லித் தந்தாங்க. அந்தப் பாட்ட இங்கிலீஷ்ல இப்படிப் பாடுவாங்க. தமிழில இப்படி,

மின்னி மின்னி விண்மீனே
உன்னைக் கண்டு வியந்தேனே
உலகின் மேலே உயர்வானில்
வைரம் போலே மின்னுகிறாய்
மின்னி மின்னி விண்மீனே
உன்னைக் கண்டு வியந்தேனே.

நா பாடுறது கேக்குதா?

ஒரு தாத்தா வந்தாங்க

2006-08-13T21:24:00.000-07:00

(மழலையை இந்த வாரத்துக்கு நட்சத்திரமாகத் தேர்ந்தெடுத்த தமிழ்மணத்துக்கு எங்கள் நன்றி! முன்னாள் நட்சத்திரங்களைப் போலக் கணதியாக மழலைக்கு எழுதத் தெரியாது. எனவே குற்றம் குறைகள் இருந்தால் பொறுத்துக் கொள்ளவும், நன்றி:-))

ஒரு தாத்தா வந்தாங்க

எங்க வீட்டில ஒரு புத்தகம் இருக்கு. அது திருக்குறள். அதில இருக்கவர்தான் திருவள்ளுவர் எண்டு அம்மாவும் அப்பாவும் சொன்னாங்க. சிலநேரம் அதைப் படிச்சுக் காட்டுவாங்க. ஒரு நாள் எங்க வீட்டுக்கு ஒரு தாத்தா வந்தாங்க. அவங்களுக்குப் பெரிய தாடி இருந்திச்சி. நா அவங்ககிட்ட கேட்டென், "நீங்கதான் திருவள்ளுவரா?" எல்லாரும் சிரிச்சாங்க. அந்தத் தாத்தா இல்லையெண்டு சொன்னாங்க. எனக்குத் திருக்குறள் தெரியுமா எண்டு கேட்டாங்க. நா ஆமா எண்டு சொல்லிட்டு,

அகர முதல எழுத்தெல்லாம் ஆதி
பகவன் முதற்றே உலகு

எண்டு சொன்னென். நீங்களும் கேளுங்க.

உங்களுக்கு ஒரு ஆச்சரியம் வச்சிருக்கென்

2006-08-12T11:24:00.000-07:00

நா வெளியில போகும்போது குச்சி, கல், இலை எல்லாத்தையும் பொறுக்குவென். அப்பாவொட போனா அம்மாவுக்கும், அம்மாவொட போனா அப்பாவுக்கும் கொண்டு வந்து "உங்களுக்கு ஒரு ஆச்சரியம் வச்சிருக்கென்" எண்டு சொல்லிட்டு அதைக் குடுப்பென். அதப் பாத்து அவங்க ஆச்சரியப்படுவாங்க. நன்றி சொல்லிட்டு வாங்கி வச்சுக் கொள்வாங்க. இண்டக்கி ல்யூலோட வெளியில விளாண்டென். அப்பாவும், ல்யூலொட அப்பாவும் பேசிக்கொண்டு நிண்டாங்க. நாங்க வண்டி ஓட்டினம், தண்ணியப் புல்லுல கொட்டி விளாண்டொம். பிறகு வீட்டுக்குள்ளாற போம்போது அம்மாவுக்கு ஆச்சரியம் ஒண்டு எடுத்தென். அது என்னெண்டா, தண்ணி போட்டு குழப்பின சேறு. அம்மாட்ட கொண்டு குடுத்தனா, அம்மா ரொம்ப ஆச்சரியப் பட்டாங்க.

1:20க்குத்தான் போவணும்

2006-08-11T13:24:00.000-07:00

அப்பா மத்தியானச் சாப்பாட்டுக்கு வீட்டுக்கு வந்தாங்க. நாங்க எல்லாரும் சாப்பிடும்போது, "அப்பா நீங்க எப்ப போவீங்க?"ன்னு கேட்டென்.
"1:20க்கு"ன்னு அப்பா சொன்னாங்க.
நா மைக்ரோவேவை திரும்பிப் பாத்தென். ஏன்னா அதுலதான மணி தெரியும்.
அப்பா சொன்னாங்க, "அதில 1 போட்டு ரெண்டு புள்ளி வச்சு 2க்கு அப்புறம் 0 வருமே அப்ப."
நா 1:20 வந்திடுச்சான்னு பாத்துக்கொண்டே இருந்தென். நாங்க சாப்பிட்டு முடிச்சிட்டு முன்னுக்குப் போயிட்டம். அப்புறமா நா வந்து மணியப் பாத்துப்போட்டு அப்பாட்ட சொன்னென்,
"இப்பதான் 1 போட்டு ரெண்டு ரெண்டு போட்டிருக்கு, இன்னும் 1:20 வரல."
அப்பா சொன்னாங்க "இல்ல குட்டி அப்படின்னா 1:20 ஏற்கனவே வந்துட்டுப் போயிடுச்சு."
நா சொன்னென், "இல்லப்பா நீங்க போக்கூடாது, 1:20 வந்த பிறகுதா போவணும்."

எனக்குக் கோவமா வருது

2006-08-10T13:00:00.000-07:00

அம்மாட்ட எனக்குத் தொலைக்காட்சி போடச் சொல்லி கேட்டுக்கொண்டே இருந்தென். அம்மா, "உங்க படம் வர்றப்ப போடுறென்" அப்படின்னு சொல்லிக்கொண்டே இருந்தாங்க. இப்ப வருமா, இப்ப வருமான்னு நா கேட்டுக்கொண்டே இருந்தென். அப்போ அம்மா சொன்னாங்க, "12 மணிக்குத்தா வரும்" எண்டு. நா சொன்னென், "அம்மா, எனக்குக் கோவமா வருது". அம்மா கேட்டாங்க, "கோவம் வர்றதுன்னா என்ன குட்டி?" நா சொன்னென், "எனக்கு இதயம் வேகமா அடிக்குது."

அம்புலி அம்புலி பாட்டு

2006-08-09T06:37:00.000-07:00

ராத்திரி சன்னலால பாத்தமா. பெருசா அம்புலி இருந்துச்சு. அம்மா ஒரு பாட்டு சொல்லித் தந்தாங்க.

அம்புலி அம்புலி, எங்க போற?
ஓல வெட்ட.
ஏ ஓல?
பெட்டி உளைக்க.
ஏ பெட்டி?
காசு போட.
ஏ காசு?
மாடு வாங்க.
ஏ மாடு?
சாணி போட.
ஏ சாணி?
வீடு மொழுக.
ஏ வீடு?
சின்னப்புள்ள இருந்து விளையாட!

என்கிட்ட ஒரு வண்டு இருக்கு

2006-08-08T14:14:00.000-07:00

அம்மா அப்பா நா எல்லாரும் நடக்கப் போனம். நா ஒரு குச்சிய கீழ கிடந்து எடுத்தென். குச்சிதான் என்னோட புல் வெட்ற எந்திரம். வழி ஓரத்தில இருந்த புல் மேல ட்ர்ர்ர்ருன்னு ஓட்டிக்கொண்டு போவென். கொஞ்சம் நேரத்தால அப்பா, "தம்பி, இங்க ஓடி வாங்களே ஒண்டு காட்டுறென்" எண்டு கூப்பிட்டாங்க. என்னவெண்டு போய்ப் பாத்தா அது ஒரு வண்டு. நா தொடலை. பயமா இருந்திச்சு. அது கடிக்குமா எண்டு கேட்டென். இல்லை அது செத்துப் போச்சு எண்டு கையில எடுத்துக் காமிச்சாங்க. அம்மா அதை ஒரு குப்பியில போட்டு வைக்கலாமெண்டு சொன்னாங்க. அந்த வண்டுக்கு ஆறு கால்கள். ரெண்டு பெரிய்ய கண்கள். 4 செட்டைகள். நாங்க அதைப் படம் எடுத்தோம். நா அதைத் தொட்டென். பிரட்டினனா, ஒரு காலில கொஞ்சம் உடஞ்சு போயிடுச்சு. இந்த வண்டை ஒரு பெட்டியில வச்சிருக்கிறன்.
இது என்ன வண்டு தெரியுமா? இந்த வண்டுக்குப் பேரு சிகாடாவாம் (Cicada). அப்படின்னா சுவர்க்கோழி எண்டு அர்த்தமாம். இதுதான் ராத்திரியில க்ரிங்ங்ங்ங்ங் எண்டு சத்தம் போடுமாம். சத்தம் வருது, பாப்பமே எண்டு கிட்டக்க போனா கண்டு புடிக்கவே முடியாதாம். இதெல்லா எனக்கு எப்படித் தெரியும் எண்டு பாக்கிறீங்களோ? இயற்கை நேசி அண்ணாதான் சொன்னாங்க!

நிறைய மை பூசிட்டா...

2006-08-07T05:54:00.000-07:00

அண்டக்கி சாந்தன் மாமாவும், அத்தை, கீர்த்தனா பாப்பா, இன்னும் இரண்டு அத்தைகள் எல்லாரும் வீட்டுக்கு வந்திருந்தாங்களா. எனக்கு ஒரு வண்ணப்பெட்டி, படங்கள் எல்லாம் கொண்டு வந்தாங்க. நேத்து நானும் அப்பாவும் அதிலயிருந்த அக்கா படத்துக்கெல்லாம் வண்ணம் தீட்டீனம். அப்போ நா எல்லா மையையும் கலந்து கலந்து நல்லா அந்தப் படங்களில தலையில இருந்து காலு வரைக்கும் பூசினன். அப்பா அந்தப் பக்கம் இருந்து இன்னொரு அக்கா படத்துக்கு மை பூசிக்கொண்டிருந்தாங்க. அப்போ பாத்தா என்னோட அக்காப்படத்தில அக்காவே தெரியல. மை மறைச்சிடிச்சு. எப்படி திரும்பவும் வெள்ளையாக்கிறது எண்டு பாத்தன். பக்கத்தில ஒரு பெரிய கிண்ணத்துல தூரிகையெல்லாம் கழுவுறதுக்காண்டி நிறைய தண்ணி வச்சிருந்தம். அதுல எல்லா அக்காக்களையும் ஒண்ணு ஓண்ணாப் போட்டு கழுவினன். அப்போ அம்மா சிரிச்சுட்டு கேட்டாங்க, "குட்டி என்ன செய்யுறிங்க?" எண்டு. நா, "அம்மா, எல்லா அக்காக்களும் swimming poolல குளிக்கிறாங்க" எண்டு சொல்லிப்போட்டு சிரி சிரி எண்டு சிரிச்சன். எல்லாரும் சிரிச்சாங்க. பிறகு அப்பாவும் அவங்க வண்ணம் பூசின படத்தைத் தண்ணியில போட்டுட்டாங்க. அதான் இந்தப்படம்.

எனக்கு நண்பர்கள் நாள் வாழ்த்துச் சொன்ன எல்லா நண்பர்களுக்கும், படம் போட்ட சிபி அண்ணாக்கும் நன்றி! உங்கள வாழ்த்துகிறன் :)

என் கேள்விக்கு என்ன பதில்?

2006-08-04T12:33:00.000-07:00

நா நேத்து ராத்திரி அம்மாட்ட சொன்னேன், "அம்மா எனக்கு நான்கு கேள்விகள் இருக்கு."

அம்மா என்ன எண்டு கேட்டாங்க.

ஒண்டாவது கேள்வி: மரம் எப்படி சாப்பிடுது?
ரெண்டாவது கேள்வி: பூமி ஏன் சுத்துது?
மூண்டாவது கேள்வி: லைட்டைப் போட்டா ஏன் கண்ணு கூசுது?
நான்காவது கேள்வி: வயித்துக்குள்ள என்ன வேலையெல்லாம் நடக்குது?

அப்புறம் மொதல்ல கேட்ட இன்னொரு கேள்வி:
பூச்சியெல்லாம் செத்துப் போகும்போது ஏன் கக்கா போடுது?

உங்களுக்கு பதில் தெரியுமா?

அம்மாவொட டாக்டர்

2006-07-27T11:55:00.000-07:00

அம்மா, அப்பா, நான் மூனு பேரும் டாக்டர் ஆபிசுக்குப் போனம். ஏன்னா இங்கெ பாருங்க தெரியும். அந்த டாக்டர் எனக்கு விருப்பம். முந்தி அங்க போனப்பொ என்னைப் படம் கீறச் சொல்லி, அவங்க சுவத்துல ஒட்டி வச்சாங்க. நேத்தும் நா ஒரு படம் கீறிக்கொண்டு போனென். அந்தப் படத்துல அம்மா, அப்பா, நா, பாப்பா, டாக்டர் எல்லாம் நிக்கிறம். டாக்டர்கிட்ட குடுத்தென். சிரிச்சுகிட்டே வாங்கி இதையும் சுவத்துல ஒட்டிட்டாங்க. அம்மா வயித்துல கொஞ்சம் ஜெல் போட்டுட்டு ஒரு மைக் வச்சாங்க. உள்ள பாப்பாவோட இதயம் ஹுஹ் ஹூஹ் அப்படின்னு வேகமா அடிக்கிறது கேட்டுச்சு. சின்ன ஆக்களுக்கு இதயம் வேகமா அடிக்கும், பெரியாக்களுக்கு மெதுவா அடிக்கும். கிளம்பும்போது டாக்டர் எனக்கு மூனு ஸ்டிக்கர் குடுத்தாங்க. அது நிமோவுல வருமே மீன், சுறா மீன் அந்தப் படமெல்லாம் இருக்க ஸ்டிக்கர். சட்டையில ஒட்டிக்குவென். அப்புறமா நான் ரயில் விளாட்டு விளாடனும்னு கேட்டென். அது சின்னப் பிள்ளைங்களோட டாக்டர் இருக்க இடத்துலதான் இருக்கு, இப்ப அங்க போமுடியாதுன்னு சொல்லிக் கூட்டிட்டு வந்திட்டாங்க.

கோயிலுக்குப் போனென்

2006-07-22T07:12:00.000-07:00

நேத்து அப்பா ஒரு இடத்துக்கு என்னைக் கூட்டிக் கொண்டு போனாங்க. அது ஒரு கோயில். நிறைய படியால ஏறிப் போனம். ஷூவெல்லாம் கழட்டிட்டு உள்ள போனம். அங்க நிறைய சிலையெல்லாம் இருந்துச்சு.

ஒரு இடத்துல,
"அதுக்குப் பக்கத்துல நா போணும்" இன்னு அப்பாட்ட சிலையக் காட்டிச் சொன்னென்.
"அந்த அறைக்குள்ள போகக்கூடாது"ன்னு அப்பா சொன்னாங்க.
"ஏன்?"னு கேட்டென்.
"அங்க எழுதிப் போட்டிருக்கு"ன்னு அப்பா சொன்னாங்க.
கொஞ்ச நேரத்தால வேட்டி கட்டிட்டு ஒரு மாமா அந்த அறைக்குள்ள போனாங்க.
"அப்பறம் அவுங்க மட்டும் போறாங்க?" அப்படின்னு அப்பாட்ட கேட்டென்.
அப்பா சொன்னாங்க,
"அவங்க இங்க வேலை பாக்கறவங்க, அவங்க மட்டுந்தான் போவலாம். கடைகள்ல சில இடங்கள்ல எழுதியிருக்குமில்ல "இதுக்குள்ள கடை ஆக்கள் மட்டுந்தான் வரணும்"னு, அதுமாதிரிதான், அந்த அறைக்குள்ளயும் இங்க வேலை பாக்கறவங்க மட்டுந்தான் போவணுமாம்."

அப்புறம் ஒரு இடத்துல ஒரு பெரிய பெட்டி மாதிரி இருந்துச்சா,
"இது என்னப்பா?"ன்னு கேட்டென்.
"அது பேரு உண்டியல்"னு அப்பா சொன்னாங்க.
"அதுல என்ன எழுதியிருக்கு?"ன்னு கேட்டென்.
"காசை இதுக்குள்ள போடுங்கன்னு எழுதியிருக்காங்க" அப்படின்னு அப்பா சொன்னாங்க.
உடனே நா கேட்டென்,
"அதுக்குள்ள காசு போட்டா என்ன வரும்?"

அப்பா சிரிச்சாங்க.

வானவில் மீன்

2006-07-18T03:17:00.000-07:00

ஒரு கடல்ல வானவில் மீன் அப்படின்னு ஒரு மீன் இருந்துச்சாம். அதுகூட யாருமே விளாடலயாம். ஏன் நம்மகூட யாரும் விளாடவே வரலைன்னு அந்த மீனுக்குக் கஷ்டமா இருந்துச்சாம். "ஏன் எங்கூட யாரும் விளாட வரலை"ன்னு நண்டுகிட்ட போயி கேட்டுச்சாம். நண்டு சொன்னுச்சாம், "நீங்க போயி நட்சத்திர மீனுகிட்ட கேளுங்க" அப்படின்னு. நட்சத்திர மீனுகிட்ட கேட்டப்ப, "நீங்க போயி அதோ அந்த ஆக்டபஸ்கிட்ட கேளுங்க"ன்னு சொன்னுச்சாம். ஆக்டபஸ்கிட்ட கேட்டப்ப, அது சொன்னுச்சாம், "வானவில் மீனே வானவில் மீனே, நீங்க யார் கூடயும் உங்க விளாட்டு சாமான்களையெல்லாம் பகிர்ந்துக்குறதே இல்ல, அதான் யாருக்கும் உங்ககூட விளாட விருப்பமில்ல. நீங்க பகிர்ந்துக்கிட்டா எல்லாரும் உங்ககூட விளாடுவாங்க"ன்னு சொன்னுச்சாம். உடனே வானவில் மீன் தன்கிட்ட இருந்த நிறங்களையெல்லாம் எல்லாருக்கும் கொஞ்சம் கொஞ்சம் குடுத்துச்சாம். அப்புறமா எல்லோரும் சந்தோஷமா ஒன்னா விளாண்டாங்களாம்.

இந்தக் கதையை நேத்து கதை நேரத்துல திருமதி வெபர் சொன்னாங்க. அப்புறமா ஒரு மீன் படத்தைத் தந்து வண்ணம் பூசச் சொன்னாங்க.

இப்ப நா பெரிய்ய பையனா வந்துட்டேன்னு சொல்லி எனக்கு ஒரு நூல்நிலைய அட்டை குடுத்தாங்க. அது மஞ்சள் நிறம். நா எத்தனை புத்தகம் வேணுமின்னாலும் எடுக்கலாம். நா நிறைய்ய்ய புத்தகம் வச்சிருக்கேன். அம்மா எனக்குப் படிச்சுப் படிச்சுக் காட்டுவாங்க. எனக்குப் புத்தகம் வாசிக்கிறது விருப்பம்.

முட்டிக்குள்ள ஒரு பாப்பா

2006-07-17T03:45:00.000-07:00

நாங்க நோர்வேக்குப் போனம். அங்க ஒரு சிலை இருந்திச்சு. இப்படித்தான் முட்டிக்குள்ள பாப்பாக்கள் எல்லாம் இருப்பாங்களாம். முட்டி எண்டா வயிறு. எங்க அம்மாட முட்டிக்குள்ளயும் ஒரு பாப்பா இருக்காங்க. தங்கச்சிப் பாப்பா வரப் போறாங்கன்னு சொன்னாங்க. தங்கச்சி இல்லாட்டி தம்பி. எனக்குத் தங்கச்சிப் பாப்பா விருப்பம். இப்பவெல்லாம் நா அம்மா, அப்பா, நா படம் கீறுறப்ப சின்னதா தங்கச்சிப் பாப்பாவையும் கீறுறன். தங்கச்சிப் பாப்பா வந்துட்டா நம்ம வீட்ல நாலு பேர் எண்டு நேத்து சொன்னென். நா தங்கச்சிப் பாப்பாவை ஸ்றோலர்ல வச்சித் தள்ளிக்கொண்டு போவென். அப்பா நேத்து ஒரு குட்டித் தலவாணியைக் கொடுத்து இதான் தங்கச்சிப் பாப்பா எண்டு சொன்னாங்க. நா தூக்கமாட்டென்னு சொன்னென். ஏனெண்டா பாப்பாவோட எச்சி ஒட்டிக்கும். ஆனா தங்கச்சிப் பாப்பாவோட விளாடுவென்.

ஏரிக்குப் போனமா...

2006-07-16T14:06:00.000-07:00

அப்பா சிரிப்பா ஒரு விஷயம் சொன்னாங்க. அது என்னன்னா, ஒரு அப்பா இருந்தாராம். அவருக்கு ஒரு பையன் இருந்தாராம். அந்த அப்பா ஒரு நாள் அந்தப் பையனைத் திருவிழாக்குக் கூட்டிட்டுப் போனாராம். அப்ப சொன்னாராம் "டேய் திருவிழாக்குக் கூட்டிட்டுப் போவேன் ஆனா ஒன்னும் கேக்கக் கூடாது." ஆனா திருவிழாவுக்குப் போனத்துக்கு அப்புறம் அந்தப் பையன் விசில் கேட்டு அழுதாராம். உடனே அந்த அப்பா சொன்னாராம், "டேய் விசில் வாங்கித் தருவேன், ஆனா ஊதக்கூடாது." எனக்கு இதைக் கேட்டா சிரிப்பா வரும்.

நாங்க நேத்து ஒரு ஏரிக்குப் போனம். அது ஒரு பெரிய்ய ஏரி. அங்க குளிக்கலாம், படகில போலாம். விளையாடலாம். அப்போ நான் அப்பாகிட்ட சொன்னென், "அப்பா, ஏரிக்குக் கூட்டிட்டுப் போவென், ஆனா நீச்சல் அடிக்கக் கூடாது." அப்பா, அம்மா, அத்தை எல்லாம் சிரிச்சாங்க. ஏரியில நா ரொம்ப நேரம் குதிச்சுக் குதிச்சுக் குளிச்சென். படகில போனென்.

அப்புறமா இண்டக்கி சாப்பிடும்போது நா சொன்னென், "அப்பா, சாப்பிடுற கடைக்குக் கூட்டிட்டுப் போவென், ஆனா முழுங்கக் கூடாது."

ஊது பந்து

2006-04-23T10:04:00.000-07:00

அப்பாவும் நானும் டேபிள் டென்னிஸ் விளையாண்டோம். கொஞ்ச நேரத்தால அப்பா அந்தப் பந்தைத் தரையில போட்டு ஊதினாங்க. பந்து உருண்டு ஓடுனுச்சு. நானும் ஊதினேன். பந்தை யார் ஊதி சுவத்துல முட்டுறாங்களோ அவங்களுக்கு ஒரு கோல். இப்படி ரொம்ப நேரம் நானும் அப்பாவும் படுத்து உருண்டு பந்தை ஊதி ஊதி விளையாண்டோம். அதான் ஊது பந்து.

நானும் இந்தச் செடியும் படும் பாடு

2006-03-26T01:33:00.000-08:00

எங்க வீட்டில இருக்கிற செடிகளில இதுவும் ஒண்டு. நா சின்னப்பிள்ளையா இருக்கும் போது இதுக்கு என்ன பேரெண்டு அம்மாக்கிட்ட கேட்டேன். Peace Lilly எண்டு சொன்னாங்க. எனக்கு இதுக்கூட விளையாடப் புடிக்கும். எங்கிட்ட இருக்கிற குட்டி குட்டி கார்கள் எல்லாத்தையும் எடுத்துண்டு வந்து செடிக்குப் போட்டிருக்கிற மண்ணையெல்லாம் அள்ளிக் கீழ போட்டு அதுல ஓட்டி ஓட்டி விளாடுவென். அம்மா வந்து பாத்துட்டு இப்படியெல்லாம் செய்ய வேணா ஏனெண்டா, மண்ணுதா அதுக்குச் சாப்பாடு அந்த சாப்பாடெல்லாம் வெளிய எடுத்து போட்டுட்டா செடி வாடிரும், தெம்பால்லாம் இருக்காது, மயக்கம் போட்டு விழுந்துடும் எண்டு சொன்னாங்க. அப்போ நா காமராஜ் தாத்தா படத்திலக்கூட ஒரு அண்ணா சாப்பிடாம மயக்கம் போட்டு விழுவாங்களே அது மாதிரியா எண்டு கேட்டேன். அதுக்கு அம்மா ஆமா எண்டு சொன்னாங்க. சரி இனிமே நா அப்படி எல்லாம் செய்ய மாட்டேன் எண்டு சொன்னேன். அண்ணைக்கு ஒரு நாள் நா சின்னப் பிள்ளையா இருந்தப்போ அந்தச் செடிக்கு மேல என் காரையெல்லாம் ஓட்டி இலையெல்லாம் முறிஞ்சிப்போச்சி. அப்போ அப்பா இப்படியெல்லாம் செய்ய வேணாம் எண்டு கண்டிப்பா சொல்லிற்றாங்க. வழக்கம் போல சரி இனி நா செய்யல எண்டு சொன்னேன். இன்னொரு நாள் அம்மா செடிக்குத் தண்ணி ஊத்திட்டு குளியலறையிலேயே வச்சிட்டு வந்துட்டாங்க. அந்தப் பக்கம் நா போனப்போ செடிய எடுத்துக் கழுவு தொட்டிக்குள்ள வச்சி நிறைய சுடுதண்ணி திறந்து விட்டேன். அம்மாவுக்கு பயங்கர கோவம் வந்திருச்சி. என்னை sofaல போய் உக்காந்து நா செய்ததெல்லாம் சரியா தப்பா எண்டு யோசிக்க சொன்னாங்க. இப்பெல்லாம் அந்தச் செடி சாப்பாட்டு மேசையிலத்தான் இருக்கு.

இண்ணைக்கு காலையில நாங்கெல்லாம் காலைச் சாப்பாடு சாப்பிட்டுக்கொண்டிருந்தப்போ அம்மா ஆஆஆ பூ பூத்திருச்சு அப்படியெண்டு சொன்னாங்க. நா மேசையில ஏறிப் பாத்தேன், வெள்ளையா ஒரு குட்டிப் பூ இருந்துச்சு. அப்பாடா, ரெண்டு வருசத்துல இப்பதான் பூத்திருக்கு எண்டு அம்மா சொன்னாங்க. தொட்டுப் பாக்கலாமா எண்டு கேட்டேன். இல்ல முதல்ல கீழ இறங்குங்க எண்டு சொல்லிற்றாங்க!

சனி ஞாயிறு

2006-03-25T02:28:00.000-08:00

நா தூங்கி எழுந்து வந்தென். அப்பா குளிக்கிற மாதிரி சத்தம் கேட்டுச்சு. உள்ள போனென். "அப்பா நீங்க இண்டைக்கி வேலைக்குப் போவேண்டாம்," எண்டு சொன்னென். அப்பா தண்ணிய நிறுத்திட்டு, திரையை விலக்கிட்டு, கீழ உக்காந்து, "ஏன் குட்டி?" அப்படிண்டு கேட்டாங்க. நா சொன்னென், "ஏன்னா நீங்க எனக்கு ரொம்ப விருப்பம்." அதுக்கு அப்பா ஒரு மாதிரி சிரிச்சுட்டு "இண்டக்கிப் போகணும் குட்டி, ஆனா சனிக் கிழமையும், ஞாயித்துக் கிழமையும் வீட்லயே இருப்பென், சரியா?" எண்டு கேட்டாங்க. நான், "சரி அப்பா, சனிக் கிழமையும், ஞாயித்துக் கிழமையும் வீட்ல இருப்பீங்க, சரி," அப்படின்னு சொல்லிட்டு மறுபடியும் போய்ப் படுத்துக் கொண்டென்.

படக்கதை

2006-03-23T02:32:00.000-08:00

அப்பா கரும்பலகையில ஒரு படம் கீறினாங்க. அதுல ஒரு சூரியனும் மலையும் இருந்துச்சு. கீழ ஒரு ஆறு கீறினாங்க. அப்பதான் நா அங்க போனென். "ஆத்துல யாரும் குளிக்காதீங்க" அப்படின்னு ஒரு அறிவிப்புப் பலகை வைக்கச் சொன்னேன். அப்பா, "இல்ல வைப்போம், ஆனா கவனமாக் குளிக்கச் சொல்வோம், ஏன்னா அது ஆழமான ஆறு"ன்னு சொல்லிட்டு, ஒரு அறிவிப்புப் பலகை வச்சாங்க. அப்புறமா அக்கரையில ஒரு காடு கீறினாங்க. அதுல ஒரு காட்டெருமை கீறச் சொன்னென். அதுவும் ஒரு மானும் புல் மேயுற மாதிரி கீறினாங்க. அப்புறம் ஒரு சாலை கீறினாங்க. "மான் குறுக்க வரும், கவனம்" அப்படின்னு அதுலயும் ஒரு அறிவிப்புப் பலகை வைக்கச் சொன்னென். ஆனா அப்பா, "காரே இந்தப் பக்கம் வரக்கூடாது"ன்னு வச்சிட்டாங்க. ஏன்னு கேட்டேன், அது மானுக்கெல்லாம் இடைஞ்சலா இருக்கும், அந்தச் சாலையில நடந்து போகலாம், சைக்கிள்ல போகலாம்னு சொன்னாங்க. அப்புறமா மேகம் கீறினாங்க. நிறைய மேகம் போடச் சொன்னென். அதுலேருந்து மழை பேயச் சொன்னென். இடியும் கீறச் சொன்னென். பாத்தா மழை பேயுது, மான் அதுபாட்டுக்கு மேயுது. அப்போ நா அப்பாகிட்ட சொன்னேன், "அப்பா மழை வருதுல்ல, அதுனால மானெல்லாம் மேல பாக்குற மாதிரி கீறுங்க," அப்படின்னு. அப்பா சிரிச்சுட்டு மானும், காட்டெருமையும் மேல பாக்குற மாதிரி கீறினாங்க. கீறி முடிச்சுட்டு, அந்த மலைக்குப் பக்கத்துல ஒரு பையன் இருந்தானாம் அப்படின்னு ஒரு கதையும் சொன்னாங்க. எனக்குக் கதை ரொம்ப விருப்பம். அதுக்காண்டிதான் அம்மா எனக்கு நிறையக் கதை வாசிச்சுக் காட்டுவாங்க.

அப்பாவுக்குப் பூ

2006-03-22T18:44:00.000-08:00

அப்பாவுக்கு பிறந்த நாள் வந்துச்சு. அம்மாவும் நானும் சேர்ந்து ஒரு வாழ்த்து அட்டை செய்தோம். சிவப்பு, மஞ்சள், இளஞ்சிவப்பு வண்ணக் காகிதமெல்லாம் எடுத்து வெட்டிப் பூ செய்தோம். அப்புறம் பச்சைநிற காகிதம் எடுத்து வெட்டி இலை தண்டு எல்லாம் செய்தோம். அம்மா ஒட்டுறதுக்கு நாந்தான் பசை எல்லாம் போட்டேன், அம்மா ஒட்டினாங்க. அப்புறம் உள்ளுக்குள்ள xoxoxoxo வும்
I love U வும், கேக் படமும், அம்மா, அப்பா, நான் படமும் கீறினேன். அப்புறம் மேசையில அப்பாவுக்காக வைச்சோம். அப்பா வந்தவுடன பாத்து ஆச்சரியப்பட்டாங்க. நன்றி சொன்னாங்க. முத்தமும் குடுத்தாங்க.

பெரிய்ய படம்

2006-03-20T18:18:00.000-08:00

அம்மாவும், அப்பாவும் ஒரு ஆச்சரியமான இடத்துக்கு என்னைக் கூட்டிக் கொண்டு போனாங்க. எந்த இடம்னு தெரிஞ்சுக்க எனக்கு ரொம்ப ஆர்வமா இருந்துச்சு. ஆனா அவங்க எங்கிட்ட அதைச் சொல்லலை. அங்க போனா நானே தெரிஞ்சுக்குவன்னு சொல்லிக் கூட்டிக் கொண்டு போனாங்க. அந்த இடத்துக்குள்ள நுழைஞ்சதும் நிறைய விளக்கெல்லாம் இருந்துச்சு. ஒரு பாப்கார்ன் கடை இருந்துச்சு. வாசம் அடிச்சது. அம்மா போயி சீட்டு வாங்கிட்டு வந்தாங்க. நாங்க ஒரு அரங்கத்துக்குள்ள போனம். அங்க நிறைய்ய நாற்காலிகளும், ஒரு பெரிய்ய திரையும் இருந்துச்சு.

கொஞ்ச நேரத்தால அந்தத் திரையில க்யூரியஸ் ஜார்ஜ் வந்தார். மஞ்சள் தொப்பிக் காரரும் வந்தார். அந்தப் படத்துல ஒரு பெரிய காவலாளி வந்து மோப்பம் பிடிச்சுப் பாத்தார். அவரைப் பாத்தப்ப எனக்கு பயமா இருந்துச்சு. வீட்டுக்குப் போகணும்னு இருந்துச்சு. அம்மா மடியில போயி உக்காந்துட்டேன். அப்புறம் பயமாயில்ல. பிறகு ஒரு பாட்டி வந்து வ்வ்வாஆஆ...அப்படின்னு பாட்டுப் பாடினாங்க. ஜார்ஜ் வந்து கலரெல்லாம் எடுத்து சுவத்துல தெறிப்பாங்க. அப்புறம் ஜார்ஜ் ஒரு மியூசியத்துல போயி டைனசோர் எலும்புல ஏறி, கீழ தள்ளிருவாங்க.

இதெல்லாம் இருக்கும். அதான் க்யூரியஸ் ஜார்ஜ் படம். ஜார்ஜ் நிறைய சிரிப்பு காமிப்பாங்க. படம் முடிஞ்ச பிறகு அப்பா அந்தத் திரைக்குப் பக்கத்துல கூட்டிட்டு போயி காமிச்சாங்க. நா அது மாதிரி பெரிய்ய திரைய பாத்ததே இல்ல.

மியாவ் மியாவ்

2006-03-19T10:08:00.000-08:00

அண்டைக்கு நானும் அம்மாவும் நிலாவொளிக் கதை நேரத்துக்குப் போனோம். அது என்னெண்டு கேக்குறிங்களா, அதுதான் moon light story time. அது வாசகசாலையில நடக்கும். நெசமான நிலா வெளிச்சத்தில எல்லாம் சொல்ல மாட்டாங்க. பின்நேரத்தில கதை சொல்லுறதால அத அப்படிச் சொல்லுவாங்க. இப்பதான் பனிக் காலம் ஆச்சே எப்படி வெளியால உக்காந்து கதை கேக்கிறது, குளிருமே, அதால ஒரு அறையிலதான் நடக்கும். எப்பவும் அங்கத்தான் நடக்கும். என்னை மாதிரி நிறைய சின்னச் சின்னப் பிள்ளைங்க எல்லாம் வருவாங்க. Steveதான் எங்களுக்குக் கதை சொல்லுவாங்க.

அவங்க அண்டைக்கு பூனையப்பத்தி ஒரு கதை சொன்னாங்க. ஆனா அந்தக் கதை எனக்குப் பெரிசா விருப்பமா இருக்கல. அப்புறம் பூனை செய்யலாம் எண்டு எல்லாருக்கும் ஒரு பை கொடுத்தாங்க. அதுக்குள்ள ஒரு brown paper bag, ஒரு மூக்கு, இரண்டு கண்கள், இரண்டு காதுகள், இரண்டு கால்கள் எல்லாம் குடுத்தாங்க. அதைக் கொண்டு பூனை செய்ய அம்மா எனக்கு உதவி செஞ்சாங்க.

இதான் நா செஞ்ச பூனைக்குட்டி. இதைக் கையில மாட்டிக் கொண்டு மியாவ் மியாவ்...ன்னு கத்தினேன்.

பறக்குது பார்! பறக்குது பார்!

2006-03-18T03:26:00.000-08:00

நா ஒரு படம் கீறினேன், அதான் இது. இது அம்மா எனக்குச் சொல்லித் தந்த பாட்டு. இந்தப் பாட்டை அம்மா சின்னப் பிள்ளையா இருக்கும் போது படிச்சாங்களாம், அப்புறம் அந்தக் கா....லத்துல அப்பாவுக்குப் படிச்சாங்களாம், நா சின்னக் குஞ்சா இருந்தப்ப என்னை நித்திரைக்குப் போடவும் படிச்சாங்களாம்.

வண்ணத்துப் பூச்சி, வண்ணத்துப் பூச்சி
பறக்குது பார்! பறக்குது பார்!
அழகான செட்டைகள், அழகான செட்டைகள்
அடிக்குது பார்! அடிக்குது பார்!

பூக்கள் மேலே, பூக்கள் மேலே
பறந்து போய், பறந்து போய்
தேனைக் குடித்து, தேனைக் குடித்து
களிக்குது பார்! களிக்குது பார்!

சிவப்பு, மஞ்சள், கறுப்பு, வெள்ளை
பொட்டுக்கள் பார்! பொட்டுக்கள் பார்!
தொட்டதும் விரலில், தொட்டதும் விரலில்
பட்டது பார்! பட்டது பார்!

வாழைப்பழத் தோல்

2006-03-15T02:35:00.000-08:00

அம்மாவும் அப்பாவும் நானும் இரவுச் சாப்பாடு சாப்பிட்டு முடிச்சப்புறம் பழம் சாப்பிடலாம் எண்டு சொல்லி, எல்லாரும் வாழைப்பழம் சாப்பிட்டோம். சாப்பிட்டு முடிச்சதும் தோலைக் கீழ போட்டுட்டேன். அப்போ அப்பா, வாழைப்பழத் தோலைக் குப்பையில போடணும் எண்டு சொன்னாங்க. அதுக்கு ஒரு கதையும் சொன்னாங்க. எப்படின்னா,

ஒரு நா ஒரு பையன் வாழைப்பழத் தோலைக் கீழ போட்டுட்டாராம். அவங்க அப்பா அது வழியா நடந்து வந்தாங்களாம். தோல் கீழ கிடந்தது தெரியாம அந்த அப்பா, அது மேல காலை வச்சு சர்ர்ருன்னு வழுக்கி தொபுக்கடீர்ன்னு விழுந்துட்டாங்களாம். அப்புறம் அடி பட்டு மருத்துவர்கிட்ட கூட்டிட்டுப் போனாங்களாம். அதுனால தோலைக் கீழ போடக் கூடாது எண்டு அப்பா சொன்னாங்க.

கதையெல்லாம் உம் உம்முன்னு கேட்டுப்போட்டு, அப்பாகிட்ட கேட்டேன், "குரங்கெல்லாம் வாழைப்பழத் தோலை எங்க போடும்?" அம்மாவும், அப்பாவும் சிரிச்சாங்க. அப்பா, "குரங்கெல்லாம் மரத்திலேயே தாவி தாவி பாய்ஞ்சு போறதால கீழ போட்டாலும் பிரச்சனை இல்ல; அதோட, அது கையையும் ஊண்டிக் கொண்டு நாலு கால் மிருகம் மாதிரிதான நடக்கும், அதனால வழுக்கி விழாது. ஆனா மனுசங்க ரெண்டு காலால நேராத்தான நடக்குறாங்க, அதனால வழுக்கி விழுந்துருவாங்க," எண்டு சொன்னாங்க. அப்புறம் அப்பாவே தோலை எடுத்துக் குப்பையில போட்டுட்டாங்க!

பிரியாணி செய்யத் தெரியுமா?

2006-03-14T02:25:00.000-08:00

அம்மாவும் நானும் அப்போ அப்போ அமைதியா இருக்கிற விளையாட்டு விளையாடுவோம். அப்படினா என்னண்டு கேக்குறிங்களா அதுதான் quiet time. நா குழப்படி ரொம்பப் பண்ணுனா இந்த விளையாட்டு விளையாடுவோம். அண்டைக்கும் விளையாடினோமா அப்போ அம்மா ஏதோ எழுதிக்கொண்டிருந்தாங்க. என்னெண்டு கேட்டேன். "Chicken பிரியாணி செய்யிறது எப்படிண்டு எழுதுறேன்," அப்படிண்டு சொன்னாங்க. அப்போ இப்படித்தான் செய்யிறது எண்டு நா சொன்னேன்,
"Biriyani rice,fry chicken, oil, chicken biriyaniக்கு chicken biriyani sauce, onion.
Cook and fry the chicken in the sauce.
Mix it with chicken and sauce and fish and gravy and some more fish and chicken.
And fry it with rice, fish, chicken and soup and biriyani.
And eat it with தயிர்.
Indain railways ல போகும் போது சாப்பிடலாம்," எண்டு சொன்னேன். அம்மா சிரிச்சிட்டு நா நல்ல சமையற்காரரா வருவேன் எண்டு சொன்னாங்க.

இதான் சித்தியாக்கள் ஒரு நா செஞ்ச இறால் பிரியாணி. (பிரியாணியை நீங்க சாப்பிட்டுட்டு படத்தை எங்களுக்கு அனுப்பினத்துக்கு நன்றி சித்தியாக்கள் :))

அவர்கள் சொல்வதும், நான் செய்வதும்

2006-02-28T16:10:00.000-08:00

அப்படிச் செய்யக் கூடாதென்று அம்மாவும் அப்பாவும் சொல்லியிருக்கிறார்கள். ஆனால் நான் மறுபடியும் அதைச் செய்தேன். அதுதான், செடி வைத்திருக்கும் அந்தத் தொட்டியிலிருந்து மண்ணைத் தோண்டித் தோண்டிக் கீழே இறைப்பதும், இறைந்த மண்ணின் மீது என் வண்டிகளை ஓட்டி விளையாடுவதும்தான். இரவு அப்பாவும் அம்மாவும் சாப்பிட்டுக் கொண்டிருந்தார்கள். நான் சாப்பிட்டு முடித்துக் கைகழுவ எழுந்து வந்தேன். கையைக் கழுவிவிட்டு என்ன செய்யலாம் எனச் சுற்றும் முற்றும் பார்த்த போது அந்தச் செடித் தொட்டியில் இருந்த மண் அள்ளு அள்ளு என்று என்னைக் கூப்பிட்டது. மண்ணை அள்ளி அள்ளிக் கழுவுதொட்டியில் (sink) போட்டேன். கூடவே சில கூழாங்கற்களையும் போட்டேன். தொட்டியில் தண்ணீர் நிரம்பிக் கறுப்புத் தண்ணீரானது. நான் இன்னும் நிறைய மண்ணைக் கொட்டி நன்றாகக் கறுப்பாக்கினேன். தண்ணீர் நிரம்பிக் கொண்டே வந்து வழியத் துவங்கிய போது உதவி உதவி என்று கத்தினேன். அப்பா வந்து பார்த்தார். பின்னாலேயே அம்மாவும் வந்தார். என்னைக் குளியலறையை விட்டு வெளியே போகச் சொன்னார்கள். அப்பா கழுவுதொட்டிக்குக் கீழேயிருந்த சாமான்களை வெளியே எடுத்துவிட்டு அந்தக் குழாயையெல்லாம் கழற்றி, குச்சியை விட்டுக் குத்தியபோது கறுப்புத் தண்ணீர் இறங்கியது. கூழாங்கற்களையும், நான் அவ்வப்போது உள்ளே போட்டிருந்த பேப்பர், க்ரேயான் எல்லாவற்றையும் அப்பா எடுத்துக் காட்டினார். அவர் கோபமாயிருந்தது போலத் தெரிந்தார். அம்மா அந்த இடத்தையெல்லாம் துடைத்துக் கூட்டிச் சுத்தம் செய்தார். அப்பா என்னை உட்கார வைத்து, "இப்படிச் செய்ய வேண்டாமென்று எத்தனை முறை சொல்வது?" என்று கேட்டார். "நா இனிமே ச்செய்யல,"ன்னு வழக்கம் போலச் சொன்னேன். "சரி உட்கார்ந்து படிக்கலாம்"ன்னு சொல்லிட்டார். நான் அடம் எதுவும் செய்யாமல் ஒழுங்காக உட்கார்ந்து படித்தேன். அமைதியாக இருந்தேன். படுக்கப் போகும்போது அப்பா அம்மாவிடம் சொன்னார், "இப்பதான் தம்பி சொல்றதக் கேக்குறார்." உடனே நான் சொன்னேன், "ஆனா நா வருத்தமா இருக்கேன்." அவர்கள் என்னை முத்தமிட்டார்கள். அதற்கப்புறம் நாங்கள் உறங்கச் சென்றோம்.
இன்றைக்கு இந்தப் படத்தை வரைந்தேன். அப்பா வேலையிலிருந்து வந்ததும் பார்த்தார். கப்பல் என்றேன். தீ வந்தால் தண்ணீர் அடிக்கும் கப்பல் என்றேன். அதோ அந்த நீல நிறக் குழாய்தான் தண்ணீரைப் பீய்ச்சி அடிக்கும் என்றேன். அப்பாவும் அம்மாவும் மகிழ்ச்சியாக இருக்கிறார்கள். நான் என் அடுத்த வேலையைப் பார்த்துக் கொண்டிருக்கிறேன். என்னவா? செய்து முடித்தவுடன்தானே எனக்கே தெரியும்!

கொழுக்கட்டைப் பாட்டு

2006-02-27T02:57:00.000-08:00

அப்பா ஒரு கொழுக்கட்டைப் பாட்டு சொல்லித் தந்தாங்க-

கொழுக்கட்டையே கொழுக்கட்டையே ஏ(ன்) வேகல?
மழயும் பேஞ்சிச்சு நா வேகல
மழயே மழயே ஏம் பேஞ்சிங்க?
புல்லு மொளைக்க நாம் பேஞ்சேன்
புல்லே புல்லே ஏம் மொளச்சிங்க?
மாடு திங்க நா மொளச்சேன்
மாடே மாடே ஏந் தின்னீங்க?
பாலு கறக்க நாந் தின்னேன்.
பாலே பாலே ஏங் கறந்தீங்க?
பால்காரர் கறந்தார் நா கறந்தேன்.
பால்கார்ரே பால்கார்ரே ஏங் கறந்தீங்க?
அம்மா சொன்னாங்க நாங் கறந்தேன்.
அம்மா அம்மா ஏஞ் சொன்னீங்க?
பாப்பா அழுதுச்சு நாஞ் சொன்னேன்.
பாப்பா பாப்பா ஏ அழுதீங்க?
எறும்பு கடிச்சுச்சு நா அழுதேன்.
எறும்பே எறும்பே ஏங் கடிச்சீங்க?
எங்க புத்துக்குள்ள கைய வுட்டா சும்மாருப்பமோ?

-அதான் பாட்டு.
இதான் அம்மா அவிச்ச கொழுக்கட்டை!
ஆனா இது வெந்த கொழுக்கட்டை. அதனால சாப்பிடும்போது நான் பாடுனென்:
கொழுக்கட்டையே கொழுக்கட்டையே ஏ வெந்துட்டிங்க?
மழையே பெய்யல வெந்துட்டென்!

தரைபடம்

2006-02-26T04:53:00.000-08:00

நா படம் வரஞ்சு கொண்டிருந்தென். கொஞ்ச நேரத்தால தூரிகைய வச்சிட்டென். படத்து மேல என் காரை ட்ர்ர்ர் ட்ர்ர்ர் அப்படின்னு ஓட்டினென். அப்பிடியே நிறமெல்லாம் சக்கரத்துல பட்டு, தரைக்கும் போயிருச்சு. அட, இது என்னடா புது மாதிரியான படமா இருக்கேன்னு அம்மா சொன்னாங்க.

என்ன கெழமை?

2006-02-25T11:53:00.000-08:00

நா தினமும் காலையில எந்திருச்சு வரும்போது அப்பாட்ட என்ன கேப்பென்...
அப்பா இன்னக்கி ஞாயித்துக் கெழமையா?
இன்னக்கி உங்களுக்கு மீட்டிங் இருக்கா?
இன்னக்கி நீங்க வேலைக்குப் போணுமா?
ஏன்னா அப்பா சனிக் கெழமை, ஞாயித்துக் கெழமைதான் வீட்டுல இருப்பாங்க. அப்பா வீட்டுல இருந்தா எனக்குச் சந்தோஷம். அதுக்காண்டிதான் அப்படிக் கேப்பென்.

சொல்லுடைப்பு

2006-02-24T03:01:00.000-08:00

நா: Iceன்னா என்ன?
அம்மா: விழுந்த பனியெல்லாம் உருகி, உறைஞ்சு கட்டி கட்டியா இருக்குமே அதான் ஐஸ்.
நா: Airன்னா என்ன?
அம்மா: Airன்னா காத்துன்னும் சொல்லலாம்; இதோ மேல இருக்கு பாருங்க வெளி, அந்தரம் அதுன்னும் சொல்லலாம். ஏன் கேக்குறீங்க?
நா: LandAirன்னா என்ன?
அம்மா: LandAirஆ?
நா: ஆமா, LandAir. IceLandAirன்னு வருமே அதான் அந்த LandAirன்னா என்ன?
அம்மா: ஓ, குட்டிப் பையா, அது ஐஸ்லாண்ட் அப்படின்னு ஒரு நாடு இருக்கு, அங்க நிறைய்ய்ய ஐஸ் இருக்கும், அந்த நாட்டோட விமானத்துக்குப் பேருதான் IceLandAir!

அம்மாவும் அப்பாவும் IceLandAir அப்படின்னு என்னைக்கோ பேசிக்கிட்டாங்க. அதைப் பத்தித்தான் கேட்டென்.

இதான் நா!

2006-02-23T17:54:00.000-08:00

திரு சகா என்னோட போட்டோ கேட்டாங்க. அவங்களுக்காக இது.
இதுல இருக்கதுதான் க்யூரியஸ் ஜார்ஜ். அது நல்லா குறும்பு செய்ற குட்டிக் குரங்கு. எனக்கு க்யூரியஸ் ஜார்ஜ் விருப்பம். அதனால அம்மாவும் நானும் இந்த மொகமூடி செஞ்சம். அதுக்குள்ள இருக்கதுதான் நா.

தூக்கத்திலயும் கேள்வி கேப்பென்

2006-02-22T03:16:00.000-08:00

நா தூக்கத்தில பிரண்டு படுத்தென்.
"தம்பி, எந்திருச்சு ஒன்னுக்கிருந்துட்டு வந்து படுத்துக்கங்க," அப்படின்னு அப்பா கூப்பிட்டாங்க.
நா "ஏன்?" அப்படின்னு கேட்டேன்.
நான் தூக்கத்துல உளருறென்னு அப்பா நெனச்சுக் கொண்டு, மறுபடியும்
"தம்பி, எந்திருச்சு ஒன்னுக்கிருந்துட்டு வந்து படுத்துக்கங்க"ன்னு சொன்னாங்க.
நா விளக்கமா "ஏன் ஒன்னுக்கிருந்துட்டு வந்து படுத்துக்கனும்?"னு கேட்டென்.
அப்பா சொன்னாங்க, "அப்பதான் படுக்கை நனஞ்சு போவாது."
நா, "சரி," ன்னு சொல்லிட்டுப் போய் ஒன்னுக்கிருந்துட்டு வந்து தூங்கிட்டென்.
நா கேட்ட கேள்வில நட்டநடு ராவையில அப்பாவுக்கு வெடுக்கெண்டு முழிப்பு வந்துடுச்சாம் - விடிஞ்சு பேசிக்கொண்டாங்க.

போலீஸ் கார்

2006-02-20T17:56:00.000-08:00

வீட்டுக்கு முன்னுக்கு ஒரு பச்சை கார் வந்து ஆண்ட் சிண்டியோட வெள்ளை காரை மோதிருச்சு. கிறீன்னு சத்தம் கேட்டுச்சு. போலீச கூப்புடுங்க போலீச கூப்புடுங்கன்னு அப்பா டெலிபோனை எடுத்து கால் பண்ணினாங்க. அப்புறம் ஆம்புலன்ஸ், போலீஸ் கார், தீ வண்டி எல்லாம் வந்துச்சு. யாருக்கும் அடி படலன்னு சொன்னாங்க. நா பாத்துக்கிட்டே இருந்தேன். அப்புறம் அப்பா போட்டோ எடுக்கச் சொன்னாங்க. அம்மா ப்ளாஷ் இல்லாம எடுங்கன்னு சொன்னாங்க. நா எடுத்தேன். இப்படி வந்துச்சு. அப்புறம் அப்பா கேமராவை அசையாம பிடிச்சுக்கிட்டாங்க, நான் அமுக்கினேன். அப்புறம் எல்லா வண்டியும் போயிருச்சு. பாத்தீங்களா போலீஸ் கார் லைட் அடிச்சுக்கிட்டு நிக்குது!

குக்கி

2006-02-19T06:56:00.000-08:00

நா அம்மாட்ட குக்கி கேட்டென். அம்மா செய்யலாமே எண்டு சொன்னாங்க. கடைக்குப் போய் மா, chocolate chips எல்லாம் வாங்கிட்டு வந்தோம். அம்மாவுக்கு நான் குக்கி பண்ண உதவி செஞ்சென். ஏன்னா நாந்தான் சின்ன சமையல்காரர். அம்மா மாவுக்குள்ள சீனி, முட்டை, சக்கரை, உப்பு, baking soda எல்லாம் போட்டாங்க. நா நல்லா கலக்கு கலக்கு எண்டு கலக்கினேன். அம்மா ட்ர்ர்ர்ன்னு சுத்துதுல்ல அதக் கொண்டு கலக்கினாங்க. நா மாவப் போட்டென். chocolate chips ஐயும் சேர்த்துக் கலக்கினோம். நா கொஞ்சம் chocolate chipsஐ சும்மாவே சாப்பிட்டென். குக்கி மாவ தட்டுல வச்சு அவன்ல வச்சு பேக் பண்ணினோம். அவனை சின்னப் பிள்ளைங்கள் தொடுறது இல்ல. சுட்டுறும். பெரியாக்கள் மட்டுந்தான் தொடணும். கொஞ்ச நேரத்தில அவனைத் தொறந்து பார்த்தா குக்கி வட்ட வட்டமா வந்திருச்சி.சாப்பிட்டு பாத்தன்... ம்ம்ம்ம்ம்ம் யம்ம்ம்ம்ம்ம்ம்ம்ம்ம்ம்ம்மீ. ஆனா நிறையச் சாப்பிட்டா கீரைப் பூச்சி கடிக்கும்.

சோர்வம்

2006-02-18T03:02:00.000-08:00

நா நேத்து ஷூ ராக்லேருந்து எல்லா ஷுவையும் கீழ தள்ளிட்டேன். அப்பா எடுத்து வைக்கச் சொன்னாங்க. என்னால எடுத்து வைக்க முடியாதேன்னு சொன்னேன். அப்பா ஏன்னு கேட்டாங்க. நான் சோர்வமா இருக்கேன்னு சொன்னேன். கொஞ்சம் சோகமா, கொஞ்சம் சோர்வா இருக்கதுதான் சோர்வம். அப்பா கண்டிப்பா எடுத்து வைக்கச் சொல்லிட்டாங்க. நான் எல்லா ஷூவையும் எடுத்து வச்சிட்டேன். அப்புறம் சோர்வமாவே இல்ல.

பொழுதொரு பேண்டேஜ்

2006-02-16T18:25:00.000-08:00

கதவுக்கு வெளியில பபுள் ஊதுற சோப் இருந்துச்சா, அதை எடுக்கப் போனேன். கதவைத் திறந்தனா, அப்பிடியே கதவு என் கால்ல அடிச்சிருச்சு. கால்ல அடிச்சு ரத்தம் வந்து, தோல் உரிஞ்சு புண் வந்துருச்சு. நடந்தா வலியும் கூடவே வருது. அம்மா மருந்து போட்டு பேண்டேஜ் போட்டாங்க. இப்ப கால் வலிக்கலை.

திமிங்கிலம்

2006-02-15T03:51:00.000-08:00

நா ஒரு படம் வரஞ்சேன். அப்பா திமிங்கிலம் மாதிரி இருக்குன்னு சொன்னாங்க. அம்மா ஆமா அந்தத் திமிங்கிலம் சுத்தி சுத்திப் பாய்ஞ்சு விளையாடுதுன்னு சொன்னாங்க.

வீட்டுக்குள்ள பனி

2006-02-13T03:27:00.000-08:00

இப்பதான் பனியில விளையாடிட்டு வர்றோம். என்னோட கொட்டு வண்டியைக் கொண்டு போனேன். அதுல நிறைய பனியை அள்ளி அள்ளிக் கொட்டிக் கொண்டிருந்தேன். பக்கத்து வீட்லேருந்து ல்யூலும் வந்தார். அவரும் நானும் கத்திக் கொண்டே ஓடுனோம். பனியில ஓட முடியாம விழுந்துட்டோம். அப்புறம் வீட்டுக்கு வரும்போது ஒரு கொட்டு வண்டி நிறைய பனியை அள்ளிக் கொண்டு வந்தோம். பாத்ரூம்ல வச்சு எறிஞ்சு எறிஞ்சு விளையாண்டேன். வீட்டுக்குள்ளயும் கொண்டு வந்து எறிஞ்சேன். அது தண்ணியாப் போச்சு. அப்புறம் ஓடும்போது அதுல வழுக்கி விழுந்துட்டேன். கொஞ்சம் வலிச்சது. இப்ப வலிக்கலை. அப்புறமா அந்தத் தண்ணியையெல்லாம் நாங்க தொடச்சிட்டோம்.

பனி மனிதனின் மூக்கு

2006-02-12T13:13:00.000-08:00

வீட்டுக்கு வெளியில நிறைய பனி பெஞ்சிருக்கு. எனக்குப் பனி, குளிர் எல்லாம் நல்ல விருப்பம். "அப்பா வெளியால போய் பனி மனிதன் செய்யலாமா" எண்டு கேட்டேன். அப்பா ஆமா சொன்னாங்க. பனி மனிதனுக்கு எப்படி மூக்கு வைக்கலாம் எண்டு கேட்டாங்க அம்மா. உடன நா fridgeஅ திறந்து இந்த மரவள்ளிக் கிழங்க எடுத்து இதான் மூக்கு எண்டேன். அம்மாவும் அப்பாவும் சிரிச்சாங்க.

அம்மா, அப்பா, நான்

2006-02-11T02:31:00.000-08:00

அம்மாவோட சேந்து ஒரு படம் கீறினேன். அதுல அம்மா, அப்பா, நான் மூனு பேரும் இருக்கோம். நீளமா, உயரமா இருக்கது அப்பா. அப்பாவுக்கு மீசை வரஞ்சேன். பக்கத்துல இருக்கது அம்மா. அம்மாவுக்கு சிவப்பு நிறத்துல லிப்ஸ்டிக்கும், நெய்ல் பாலிஷும் வரஞ்சேன்.
குட்டியா இருக்கது நான்.

வண்டி பாக்குறேன்

2006-02-10T03:55:00.000-08:00

எங்க வீட்டுக்குப் பக்கத்துல ஒரு ரோட் இருக்கு. அதுல போற வண்டியெல்லாம் பாப்பேன். ஆம்புலன்ஸ், தீவண்டி, போலீஸ் கார் எல்லாம் ஊஊஊன்னு சத்தம் போட்டுக்கிட்டு, லைட் அடிச்சுக்கிட்டே போவும். சில நேரம் வீட்டுப் பக்கம் வராம வேற ரோட்ல போயிரும். எங்கயோ தீப் புடிச்சுருச்சு, யாருக்கோ உடம்புக்கு முடியல, அதான் எல்லாம் போவுதுன்னு சொல்லுவேன். நா சன்னலுக்கு வர்றதுக்குள்ள அதெல்லாம் போயிருச்சுன்னா மிஸ் பண்ணிட்டனேன்னு அழுவேன். அப்புறம் அழமாட்டேன். அன்னக்கி ஒரு நாள் பெரியம்மா, பெரியப்பாவெல்லாம் வந்தப்ப சூடம் கொளுத்துனோம். அப்போ புகை வந்து அந்த பயர் அலார்ம்ல பட்ருச்சு. உடனே வீ வீன்னு பயர் அலார்ம் சத்தம் போட்டுச்சு. மூனு தீ வண்டி வந்துச்சு. ஒரு தீயணைப்பு மாமா வீட்டுக்கு வந்து புகை வருதான்னு கேட்டார். நான் சன்னல்ல இருந்து தீ வண்டியைப் பாத்துக்கிட்டே இருந்தேன்.

தக்ஷா

2006-02-09T02:46:00.000-08:00

நானும் அப்பாவும் பனிக்கரடி விளாட்டு விளாண்டோம். அப்பா பெரிய கரடி. நா குட்டிக் கரடி. சோபாவெல்லாம் கட்டிப் பனி. பனியை எம்பி எம்பி ரெண்டு கையாலயும் அடிச்சு உடைச்சோம். உள்ளே மீன் நண்பர்கள் இருந்தாங்க. ஹலோன்னு அப்பா அவங்ககிட்ட பேசினார். அவங்க எங்கயோ வேற கடல்லேருந்து வர்றாங்கன்னு அப்பா சொன்னார். நானும் ஒரு பனிக்கட்டிய ஒடச்சேன். பாத்தா ஒரு மீன் நண்பர் இருந்தார். நானும் ஹாய் சொன்னேன். என் காதுல கைய வச்சுக் குவிச்சு மீன் சொல்றதை உத்துக் கேட்டேன். அப்பாட்ட திரும்பி, "இந்தியாவுலேருந்து வர்றாங்களாம்,"னேன். அப்பா பேர் என்னவாம்னு கேட்டார். நா மீனக் கேட்டேன். மறுபடியும் காதுல கை வச்சு உத்துக் கேட்டுட்டுச் சொன்னேன், "தக்ஷா." நல்ல பேரு குட்டிக் கரடியேன்னார் அப்பா. எப்படி இந்தப் பேரைக் கண்டு புடிச்சேன்னு அப்பாவும் அம்மாவும் கேட்டுக்கிட்டாங்க. நா அடுத்த பனிக்கட்டிக்குத் தாவுறேன்.

படத்துல இருக்கது, முந்தி ஒரு நா, என் சட்டையில நானே கீறிக்கிட்ட மீன்.

ய்ய்யம்மி தயிர்

2006-02-08T04:04:00.000-08:00

உங்களுக்குத் தயிர் புடிக்குமா? என் அம்மாவுக்குக் கொஞ்சம் புடிக்கும். அப்பாவுக்கு நல்லா புடிக்கும். ஆனா எனக்கு நல்ல்ல்ல்ல்ல்ல்ல்ல்லாப் புடிக்கும். அம்மா வீட்டில செய்யிற தயிர், கடையில வாங்குற தயிர், இனிக்குற தயிர், இனிக்காத தயிர், எல்லாம் புடிக்கும். நா தயிர வித்தியாசமா வித்தியசமா சாப்பிடுவன். சோறுல போட்டு உப்பு போட்டு சாப்பிடுவன். oatmeal செஞ்சி அதுல தயிர் போட்டு சாப்பிடுவன். இட்லில போட்டு சாப்பிடுவன். தயிர் போட்டா அந்தத் தட்டில குழம்பு போடக் கூடாது. ஏன்னா தயிர் மஞ்சளாப் போயிடும். அது எனக்கு விருப்பமில்லாதது. அம்மா சாதத்தில தயிர் போட்டு சக்கரைப் போட்டு உப்புப் போட்டு சாப்பிடுவாங்க. ஆனா எனக்கு சக்கரைப் போடாம சாப்பிடுறதுதான் புடிக்கும். அதுதான் தெம்பு. எனக்கு எப்பவும் தயிர் சாப்பிட விருப்பம். ஆனா ராத்திரில சாப்புடக்கூடாதுன்னு சொல்றாங்களே.

அங்காடி ரயில்

2006-02-07T02:17:00.000-08:00

நானும் அம்மாவும் mallக்கு போனோம். Mallக்குத் தமிழில அங்காடி எண்டு சொல்லி கொடுத்தாங்க. அங்க ஒரு சிவப்பும் பச்சையும் சேர்ந்த ரயில் ஒன்டு இருக்கு. என்ன மாதிரி சின்ன பசங்கல்லாம் வந்து அந்த ரயிலில போவாங்க. அந்த அங்காடிக்கு போவும் போதெல்லாம் அதுல ஏறிப் போவன். என்னோட பெரியப்பா எங்க வீட்டுக்கு வந்தப்போ எனக்கு நிறைய ரிக்கட் வாங்கிக் கொடுத்தாங்க. இன்டைக்கும் போனன். நா எப்பப் பார்த்தாலும் எந்திரத்திலதான் ஒக்காருவேன். அப்பத்தான் எல்லாம் நல்லாத் தெரியும். நீங்களும் அங்காடிக்குப் போய் ரயில்ல போங்க, முன்னாடி இருந்து போங்க. அரும்ம்மையா இருக்கும். see you later.

நீங்க வச்சிருக்கீங்க

2006-02-06T03:34:00.000-08:00

நா புது தாமஸ் ச்சூச்சூ ட்ரெயின் புக்ல படம் பாத்தேன். என்ன வாங்கலாம்னு பாத்தேன். எனக்கு ஒரு டீசல் வாங்கனும்னு விருப்பமா இருந்துச்சு. "தாமஸ் ச்சூச்சூ ட்ரெயின் கடைக்குப் போலாமா?"ன்னு அப்பாவைக் கூப்புட்டேன். "தாமஸுக்குத் தனியா கடையில்லை,"ன்னு அப்பா சொன்னார். அந்தப் புத்தகத்துல போன் நம்பர் இருந்துச்சு. நா போனை எடுத்துட்டு வந்து, "கால் பண்ணுவோம்,"னு சொன்னேன். "நீங்களே கூப்புடுங்க,"ன்னு அப்பா சொன்னார். "சரி, கூப்பிட்டு என்ன கேப்பீங்க?"ன்னு அப்பா கேட்டார். "i want buy one dieselன்னு கேப்பேன்,"னு சொன்னேன். "காசு கேப்பாங்களே, என்ன செய்வீங்க?"ன்னு அப்பா கேட்டார். "நீங்க வச்சிருக்கீங்க,"ன்னு சொல்லிட்டு அப்பாவோட வாலட்டை எடுத்துட்டு வந்து காமிச்சேன். எல்லாரும் சிரிச்சாங்க. நானும் சிரிச்சேன்.

கருத்தறிதல்

2006-02-05T01:41:00.000-08:00

என் அம்மா நல்லா சமையல் பண்ணுவாங்க. என் அம்மா சமையலுல எனக்கு ரொம்பப் புடிச்சது உருளக்கிழங்கு பொரியல், புடிக்காதது அதுல போடுற சீரகமும் வெங்காயமும். அண்டைக்கு அம்மாகிட்ட நான் கிழங்கு பொரியல் கொஞ்சமா உறைப்பு போட்டு கேட்டேன். உடனே அம்மா ஆர்வக் கோளாறுல எனக்கு வேண்டாதது எல்லாம் போட்டு பொரிச்சு வச்சிருந்தாங்க. நா வேணான்னு அட்டகாசம் பண்ண, அம்மா சொன்னாங்க "அதுதான் தெம்பு, எல்லாம் சாப்பிட்டு பழகத்தான் வேணும் குட்டி" எண்டு. அப்போ நா சொன்ன "இல்ல அம்மா சீரகம் போட்டு சாப்பிட்டா சோர்வு எண்டு". அம்மா புரியாம என்ன பாத்தாங்க. அப்போ நா சொன்ன "அம்மா அப்படியென்னா தெம்பு இல்ல" எண்டு. அம்மா சிரிச்சிட்டு கேட்டாங்க "எப்படிடா குட்டி உனக்கு இந்த வார்த்தையெல்லாம் தெரியுது ?"எண்டு. அப்போ நா சொன்ன "just like that."

தேங்காய்க்கண்

2006-02-04T01:40:00.000-08:00

நானும் அப்பாவும் படிச்சுக் கொண்டிருந்தோம். அம்மாவுக்கு உதவி செய்வோம்ன்னு எந்திரிச்சுப் போனோம். அம்மா தேங்காயை உடைக்கச் சொன்னார். நான் தேங்கா ஜூஸ், தேங்கா ஜூஸ்ன்னு குதிச்சேன். தேங்காத் தண்ணின்னு அப்பா சொன்னார். தேங்காயை எடுத்து வெளிய வச்சார். பாத்தா தேங்காய்க்குக் கண்ணு இருந்துச்சு. இங்க பாருங்க தேங்காய்க்குக் கண்ணு இருக்குன்னு சொன்னேன். அப்பாவும் அம்மாவும் சிரிச்சாங்க. நா அதோட வாயைக் கிள்ளிட்டேன். தேங்காயைப் படம் புடிச்சோம். பாத்தீங்களா கண்ணு, வாய் எல்லாம் இருக்கு.

அப்புறமா தேங்காயை உடைச்சுத் தண்ணியை வடிகட்டி எனக்குக் குடுத்தாங்க. நல்லா இனிச்சுச்சு. ஓகே, பை.

குருவி சூரியனுக்குள்ள போச்சு

2006-02-03T03:47:00.000-08:00

என் அப்பா பச்சை நிறத்தில் இப்படி இப்படிச் செய்தார். என்னிடம் இது என்ன என்று கேட்டார். நான் பாம்பு என்றேன். அப்புறம் இன்னும் கொஞ்சம் பச்சையை அடித்தார். மறுபடியும் இது என்ன என்றார். நான் புல் என்றேன். மறுபடியும் பச்சையடித்தார். என்ன என்றார். எனக்குத் தெரியாது என்றேன். நன்றாக யோசிக்கச் சொன்னார். நான் யோசித்தேனா இல்லையா என்று தெரியவில்லை. அப்புறம் கொஞ்சம் பழுப்பை எடுத்துக் கீழே அடித்தார். என் பக்கம் திருப்பி இப்போ என்ன என்றார். நான் பார்த்துக் கொண்டே இருந்தேன். இப்படி உய்ய்யரமாய் இருக்குமே அது என்ன என்றார். நான் மலை என்றேன். அப்பா வெரிகுட் என்றார். அப்புறம் அப்பா வானத்தில் ஒரு சூரியன் வரைந்தார். வேறு என்ன வானத்தில் இருக்கும் என்று கேட்டார். நான் குருவி என்றேன். குருவி வரையச் சொன்னார். என்னிடம் கருப்பு இருந்தது. பாருங்கள், நான் வரைந்த குருவி அது. அப்பா அருமை என்றார். குருவி எங்கே போகிறதென்று கேட்டார். அது சூரியனுக்குள்ள பறக்கப் போவுதுன்னு சொன்னேன். அப்புறம் சூரியனுக்குள்ள குருவி வரைஞ்சேன். அங்க பாருங்க இருக்கு, கருப்பா, அதான். சூரியனுக்குள்ள சூடா இருக்குமில்ல, அதுனால குருவி செத்துப் போச்சு. பாதி பாதியா கீழ விழுந்துருச்சு. எங்க வீட்டுக்கிட்ட கூட ஒரு பாதி குருவி கிடந்துச்சு. ஆனா இது வேற குருவி. ஒடம்புக்கு முடியாம செத்துப் போச்சுன்னு அம்மா சொன்னாங்க. ஓகே, பை.